एजेन्सी – करिम बेन्जेमा रियल म्याड्रिडका महत्वपूर्ण खेलाडी हुन् । दुई वर्षअघि क्रिस्टियानो रोनाल्डोले रियल छाडेपछि टोलीको अग्रपंक्तिको धेरै जिम्मेवारी बेन्जेमाको काँधमा गयो ।

अझ आशा गरिएका इडन हाजार्डले चोट र अन्य कारणले उच्च प्रदर्शन गर्न नसकेपछि बेन्जेमामाथि झनै बढी दबाब थियो । बेन्जेमा त्यसमा खरो उत्रिए । रियलले गत सिजन ला लिगा उपाधि जित्दा उनको भूमिका अहम रह्यो ।

आधुनिक फुटबलमा गोल गर्नुलाई मात्र होइन पुरा टोलीलाई सहयोग गरेर खेल्नुलाई बढी अर्थपूर्ण मानिन्छ । बेन्जेमा त्यस्तै एक हुन् । उनले आफ्नो जिम्मेवारी सफलतापूर्वक निर्वाह गरेका छन् । उनले रियलबाट अर्को कोसेढुंगा पार गरेका छन् ।

आइतबार रियलले लेभान्तेलाई २–० ले हराउँदा बेन्जेमाले दोस्रो गोल गरेका थिए । रियलका लागि त्यो उनको २ सय ५० औं गोल थियो ।
बन्जेमा स्ट्राइकरले जति सक्दो टोलीको खेलमा योगदान गर्नुे पर्नेमा जोड दिन्छन् । उनी सहकार्मीहरुलाई सहयोगी हुनुपर्ने बताउँछन् ।

‘म खुसी छु । आफ्नो गोलमा मलाई गर्व छ । हामीले क्लबका लागि गरेको प्रदर्शनमा नि मलाई उत्तिकै गर्व छ । किनकी लगातार मेहनत गरेर टोलीका लागि गोल गर्नु साच्चै गौरवको विषय हो, ‘उनले भने,’मान्छेहरुले फुटबललाई आ आफ्नो ढंगले हेर्छन । कतिले गोलमा मात्र ध्यान दिन्छन् । तर फुटबलमा पासको पनि त्यतिनै महत्व हुन्छ । म फरवार्ड हुँ र गोल पनि गर्छु नै ।’

बेन्जेमा रियलको इतिहासमा सर्वाधिक गोलकर्ताको पाँचौ स्थानमा छन् । शीर्षस्थानमा रहेको रोनाल्डोले ४ सय ५१, राउल गोन्जालेजले ३ सय २३, अल्फेर्डो डि स्टेफानोले ३ सय ८ र कार्लोस सान्टिलानाले २ सय ९० गोल गरेका छन् ।

रियलका लागि १२ सिजन खेलिरेहका बेन्जमाले क्लबबाट ५ सय १७ खेल खेल्दै १९ उपाधि जितेका छन् । लेभान्तेविरुद्धको गोल बेन्जमाको जारी सिजनमा पहिलो गोल हो । गत सिजन उनले क्लबका लागि २१ गोल गर्नुका साथै ८ एसिस्ट गरेका थिए । तीन वर्षपछि रियल गत सिजन ला लिगा जित्न सफल भएको थियो ।