एजेन्सी – इंग्लिस प्रिमियर लिग क्लब वल्भ्सका विंगर एडामा ट्राओरे एकै समयमा दुई फरक राष्ट्रिय टोलीमा परेका छन् । यसै साता हुने अन्तर्राष्ट्रिय खेलका लागि स्पेन र मालीको राष्ट्रिय टोलीले ट्राओरेको नाम आ-आफ्नो टोलीमा घोषणा गरेका हुन् ।

मालीले यसै साता घाना र इरानसँग मैत्रीपूर्ण खेल खेल्ने कार्यक्रम रहेको छ । प्रशिक्षक मोहमद मगसौबाले ट्राओरेलाई समेत राष्ट्रिय टोलीमा समेटेका थिए । स्पेनका लागि उमेर समूह फुटबल खेलेपनि सिनियर टोलीमा भने ट्राओरेले अवसर पाएका थिएनन् । उनको आमा-बुबा दुवै मालीका नागरिक भएपनि ट्राओरेको जन्म स्पेनमा भएको थियो । त्यसैले उनले जुनै टोलीबाट पनि खेल्न पाउँछन् ।

पछिल्लो १८ महिनायता स्पेन र मालीबीच ट्राओरेलाई आफ्नो राष्ट्रबाट खेलाउन कडा प्रतिस्पर्धा भइरहेको थियो । स्पेनले यसअघि दुई पटक उनलाई टोलीमा समेटेपनि उपस्थित हुन भने सकेका थिएनन् । पहिलो पटकमा चोट कारण अनुपस्थित उनी दोस्रो पटक भने कोरोना संक्रमणका कारण डेब्यु गर्नबाट चुकेका थिए । यसपटक भने मालीले आफ्नो टोलीमा समेटेपनि ट्राओरे स्पेनी टोलीबाट नै प्रशिक्षणमा सहभागी भएका छन् ।

बार्सिलोनाको एकेडेमी ला मासियामा हुर्केका ट्राओरेले यसअघि भने आफू जुनसुकै राष्ट्रबाट पनि खेल्न तयार रहेको बताएका थिए । ‘मैले जुन टोलीबाट खेलेपनि राम्रो प्रदर्शन गर्नका लागि मिहिनेत गर्नेछु । मैले दुई राष्ट्रबीच कुनै एक रोज्ने अवसर पाउँदा खुसी छु । दुवै टोलीलाई मलाई मौका दिन खोजेकोमा आभारी छु । स्पेन म जन्मेको देश हो भने माली मेरो पूर्वजहरुको देश,’ उनले भनेका थिए ।

फिफाको नियमअनुसार सिनियर टोलीमा कुनैपनि राष्ट्रको प्रतिनिधित्व गरेका खेलाडीले अर्को टोलीमा खेल्न नपाउने प्रावधान थियो । तर पछिल्लो महिना फिफाले नियम परिमार्जन गर्दै २१ वर्षभन्दा कम उमेरमा तीन ओटासम्म खेल खेलेको अवस्थामा पनि खेलाडीले अर्को राष्ट्रबाट खेल्न पाउनेछन् । विश्वकप वा महादेशीय प्रतियोगिता खेलेको हकमा भने राष्ट्र परिवर्तन गर्न पाइनेछैन ।

२४ वर्षीय ट्राओरे सोमबार नै स्पेनको प्रशिक्षणमा सहभागी भएका छन् । उनले अब अक्टोबर १० मा स्विटजरल्यान्ड अथवा तीन दिनपछि युक्रेनविरुद्ध खेलेको खण्डमा मालीको प्रतिनिधित्व गर्न पाउने छैनन् ।