एजेन्सी – अन्तर्राष्ट्रिय मैत्रीपुर्ण खेलमा आज बुधबार राति जर्मनी र टर्कीले प्रतिस्पर्धा गर्दैछ । जर्मनी र टर्कीबीचको खेल राति १२ः३० बने कोल्नमा हुनेछ ।

नेसन्स लिगको थप तयारीका लागि दुवै टोलीले मैत्रीपुर्ण खेल खेल्न लागेका हुन्। यि दुई टोली २०११ पछि पहिलोपटक खेल्न लागेका हुन् । २०१२ को युरोकपको लागि २०११ मा भएको छनोट खेलमा समूह ‘ए’ रहँदा यि दुई टोलीले दुई खेल खेल्दा दुवैमा जर्मनी विजयी भएको थियो ।

जर्मनी सोही जितको लयलाई निरन्तरता दिने योजनामा हुनेछ । तर, जर्मनीसँग मुख्य फरवार्ड टिमो वेर्नर रहने छैन । ज्वरोका कारण उनी टोली बाहिर छन् । सर्ज जिनाब्री र जियानलुका वाल्समिट टिमोको स्थानमा खेल्न पाउने सम्भावना छ । काई हाभर्टज, जुलियन ड्राक्सलर, लियोन गोरेट्जका, योसुवा किम्मिख, जुलियन ब्रान्ट, रोविन गोसेन्स, एन्टोनियो रुडिगर, म्याथियस जिन्टर, इम्री क्यान र बन्ड लेनोले टर्कविरुद्ध पहिालो रोजाईमा खेल्न पाउने सम्भावना छ ।

यता, टर्की पनि घरेलु टोलीलाई पराजित गर्दै जर्मनीसँगको हारको श्रृंखलालाई तोड्ने दाउमा हुनेछ । टर्कीसँग बुराक इलमाज, हकान कालहानोग्लु, युसुफ याजिसी, ओजान तुफान, काग्लर सोयुन्कु र मर्ट गुन्नोक रहेका छन् ।

मैत्रीपुर्ण खेलपछि लिग ‘ए’ को ४ मा रहेको जर्मनीले ११ अक्टोबारमा तेस्रो राउन्डमा युक्रेनको तथा १४ अक्टोवरमा चौथो राउन्डमा स्वीट्जरल्यान्डसँग खेल्दे तालिका छ । समूहमा जर्मनी दुई खेलमा बराबरी खेल्दै २ अंक जोडेर तेस्रो स्थानमा छ । १ अंक जोडेर स्वीट्जरल्यान्ड पुछारमा रहँदा स्पेन ४ अंक जोडेर शीर्षस्थानमा तथा युक्रेन ३ अंक जोडेर दोस्रो स्थानमा रहेको छ ।

यस्तै लिग ‘बी’ को ३ मा रहेको टर्कीले १२ अक्टोवरमा तेस्रो राउन्डमा रसियासँग तथा १५ अक्टोवरमा चौथो राउन्डमा सर्वियासँग खेल्ने तालिका छ । टर्की १ अंक जोडेर तेस्रो स्थानमा रहँदा रसिया ६ अंक जोडेर शीर्षस्थानमा तथा हंगेरी ३ अंकसहित दोस्रो स्थानमा छ । १ अंक रहेको सर्विया पुछारमा छ ।