एजेन्सी – फरवार्ड करिम बेन्जेमाले रियल म्याड्रिडका लागि ५ सय १७ खेल खेलिसकेका छन् । अब १० खेलपछि उनले रियलका लागि सर्वाधिक खेल खेल्ने विदेशी खेलाडीमा रोर्बेटो कार्लोसको कीर्तिमान बराबरी गर्नेछन् ।

फ्रान्सेली फरवार्डको रियलमा यो १२ औं सिजन हो । लियोनबाट सन् २००९ मा उनी रियलमा आबद्ध भएका थिए । ला लिगामा यसै साता लेभान्तेविरुद्धको खेलमा गोल गर्दै बेन्जेमाले रियलका लागि २ सय ५० गोल पुरा गरेका थिए । पछिल्लो दुई सिजन उनको प्रदर्शन स्तरीय रहँदै आएको छ । क्रिस्टियानो रोनाल्डोले रियल छाडेदेखि फरवार्डको जिम्मा बढी उनलाई नै परेको छ ।

२०१८-१९ को सिजनमा ३० गोल गरेका बेन्जेमाको रियलमा त्यो दोस्रो उत्कृष्ट सिजन हो । त्यसअघि उनले २०११-१२ मा ३२ गोल गरेका थिए । पछिल्लो सिजन उनले ४८ खेलमा २७ गोल गरेका थिए । उनी लगायतको महत्वपूर्ण प्रदर्शनमा रियलले गत सिजन ला लिगाको उपाधि जितेको थियो ।

प्रशिक्षक जिनेदिन जिदानको नेतृत्वमा उनले उच्च प्रदर्शन गर्दै आएका छन् । जिदानले पनि उनीमाथि विश्वास गर्छन् र उनले आफुलाई मैदानमा खरो उतारेका छन् । चोटका कारण पछिल्लो दुई सिजन उनले मात्र ५ खेल गुमाएका थिए । कार्लोसको कीर्तिमान बराबरी गर्ने मौका बेन्जेमा भन्दा अगाडि मार्सेलोलाई थियो । तर पछिल्लो दुई सिजन उनी टोलीको नियमित सदस्य बन्न सकेका छैनन् ।

यदि कुनै अन्यथा नभएको खण्डमा नोभेम्बरको अन्तिम सातामा अलाभेसविरुद्धको खेलमा बेन्जेमाले कार्लोसको कीर्तिमानको बराबरी गर्नेछन् । फरल्यान्ड मेन्डीको आगमन पछि जिदानले मार्सेलोलाई कमै मात्र मौका दिइरहेका छन् । त्यसका बावजुद पनि मार्सेलोले रियलबाट ५ सय १० खेल खेलेका छन् । बेन्जेमा भन्दा मार्सेलो ३ सिजनअघि रियलमा आबद्ध भएका थिए ।

बेन्जेमा र मार्सेलो दुवैलाई क्लबकै लागि सर्वाधिक खेल खेल्न खेलाडी बन्न भने कठिन नै देखिन्छ । राउल गोन्जालेजले रियलका लागि सर्वाधिक ७ सय ४१ र कप्तान सर्जियो रामोसले ६ सय ५४ खेल खेलिसकेका छन् ।