काठमाडौं (हाम्रो खेलकुद) – नेपाली राष्ट्रिय फुटबल टोलीका फरवार्ड अभिषेक रिजाल सम्मिलित मोहमडन सपोर्टिङ क्लबले हिरो आई लिग छनोट प्रतियोगितामा विजयी सुरुवात गरेको छ ।

बिहीबार भारतको कोलकातास्थित कल्याणी रंगशालामा भएको खेलमा मोहमडनले घरवाल फुटबल क्लबलाई १-० ले पराजित गरेको हो । इन्ज्युरी समयको अन्तिम मिनेटमा मुनमुन लुगुनले लामो दुरीबाट गरेको प्रहार गोलमा परिणत हुँदा मोहमडनले विजयी सुरुवात गरेको हो । मुनमुनले झन्डै २५ यार्ड टाढाबाट गरेको प्रहार सिधै गोलमा परिणत भएको थियो ।

त्यसअघि खेलको दोस्रो हाफमा नै मोहमडनले पेनाल्टीमार्फत अग्रता लिने अवसर चुकाएको थियो । ६७ औ मिनेटमा विलिस प्लाजाको थ्रु बललाई गनी अहमदले नियन्त्रणमा लिने प्रयास गर्दा गोलरक्षक सयाक बराईले पेनाल्टी क्षेत्रभित्र फल गरेपछि मोहमडनले पेनाल्टी पाएको थियो । तर ट्रीनिडाड एन्ड टोबेगोका फरवार्ड प्लाजाको पेनाल्टी पोस्टमा लागेर बाहिरिएको थियो ।

पेनाल्टी चुकाएको पाँच मिनेटपछि प्लाजाको प्रहार क्रसबारमा लागेर फर्कियो । आक्रामक रणनीतिका साथ उपस्थित मोहमडनले ८२ औं मिनेटमा नेपाली फरवार्ड अभिषेक रिजाललाई मैदान प्रवेश गराएको थियो ।

प्लाजाको स्थानमा मैदान छिरेका अभिषेकले मैदानमा झन्डै १२ मिनेट बिताउँदै आक्रमणमा निकै छरितो देखिएका थिए । अभिषेकलाई मोहमडनले सेन्टर फरवार्डको भूमिका दिएको थियो ।

बिहिबारनै भएको अर्को खेलमा भवानीपुर क्लबले बेंगलुरु युनाइटेडलाई २-० ले पराजित गरेको थियो । प्रतियोगितामा ५ टोलीको सहभागिता रहेको छ । सिंगल राउन्ड रोबिन लिगपछि शीर्ष स्थानमा रहने टोलीले अर्को सिजन आइलिग खेल्नेछ । नेपालका अर्का फरवार्ड राजेश परियारले अहमदाबाद र्याकेट एकेडेमी (एआरए) फुटबल क्लबबाट खेल्दै छन् ।