एजेन्सी – मिलान ‘डर्वी’ मा स्वीडिस भेट्रान फरवार्ड ज्लाटन इब्राहिमोभिचले दुई गोल गरेपछि एसी मिलानले इटालियन सिरी ‘ए’ मा इन्टर मिलानलाई २–१ ले पराजित गरेको छ ।

मिलानले २०१७ पछि इन्टर मिलानलाई हराउन सफल भएको हो । २०१७ डिसेम्वरमा कोपा इटालियाको क्वाटरफाइनलमा मिलानले अतिरिक्त समयमा १–० को जित निकालेको थियो । त्यसयता मिलानले इन्टरमाथि पछिल्लो पाँच खेलमा जित निकाल्न सकेको थिएन ।

इन्टरको मैदानमा शनिबार राति भएको खेलमा मिलानले खेलको १३औं मिनेटमा अग्रता लिएको लिएको थियो । ज्लाटनले पेनाल्टी चुकाएपनि रिवाउन्डमा गोल गर्न सफल भएको थियो । हकान कलहानोग्लुलाई एलेक्सान्डर कोलारोभले फल गरेपछि रेफ्रीले मिलानलाई पेनाल्टी दिएको थियो ।

१६औं मिनेटमा राफयल लियोको पासमा ज्लाटनले व्यक्तिगत दोस्रो गोल गरेपछि मिलानले खेलमा २–० को अग्रता बनाउन सफल भयो । १८औं मिनेटमा रोमेलु लुकाकुको प्रहारलाई मिलानका गोलरक्षक जियानलुजी डोन्नररुम्माले बचाए । २९औं मिनेटमा लुकाकुले गोल गर्दै खेललाई २–१ को अवस्थामा ल्याए । उनले इभान पेरिसिसको पासमा गोल गरेका थिए ।

३२औं मिनेटमा अचरफ हाकिमीको क्रसमा लोउटारो मार्टिनेजको हेडरलाई सिमोन केजाइरले राम्ररी क्लियर गर्न नसकेको बललाई लुकाकुमार्फ निको बरेल्लाले गरेको प्रहारलाई डोन्नररुम्माले बचाए । पहिलो हाफको इन्ज्युरी समयमा आर्टुरो भिडालको कर्नरमा लुकाकुको हेडर पोस्ट नजिकैबाट बाहिरिदा इन्टर बराबरीबाट चुक्यो ।

७२औं मिनेटमा स्यामुइल क्यास्टेलिजो पासमा राडे क्रुनिकको प्रहारलाई इन्टरका गोलरक्षक समिर हान्डानोभिकले बचाए । ७३औं मिनेटमा इन्टरले पेनाल्टीको अपिल गरेपनि भिएआरबाट मान्यता पाएन । ८४औं मिनेटमा थियो हर्नान्डेजको फ्रिकिकमा ज्लाटनको हेडरलाई इन्टरका डिफेन्डरले क्लियर गरिदिए । इ

न्ज्युरी समयको थप गरिएको तेस्रो मिनेटमा मार्टिनेजको पासमा लुकाकु चुके । त्यसपछि लुकाकुकै अर्काे प्रहारलाई डोन्नररुम्माले उत्कृष्ट बचाउ गदै मिलानलाई २–१ को जित दिलाए । जितसँगै अपराजित रहेको मिलान ४ खेलबाट १२ अंक जोडेर शीर्षस्थानमा उक्लिएको छ । पराजित इन्टर ७ अंकसहित छैटौ स्थानमा छ ।

यस्तै अर्काे खेलमा साम्पडोरियाले लाजियोलाई ३–० ले पराजित गरेको छ । साम्पडोरिया ६ अंकसहित नवौं स्थानमा तथा लाजियो ४ अंकसहित ११औं स्थानमा छ ।