एजेन्सी – पोलिस फरवार्ड रोबर्ट लेवान्डोस्की र जर्मन मिडफिल्डर थोमस मुलरले समान दुई गोल गरेपछि बायर्न म्युनिखले जर्मन बुन्डेसलिगामा सानदार जित दर्ता गरेको छ । बायर्नले नव प्रवेशी अर्मेनिया बिलेफिल्डमाथि ४–१ को फराकिलो जित निकालेको हो ।

खेलको आठौं मिनेटमा थोमस मुलरको गोलबाट बायर्नले अग्रता लिएको थियो । २६औं मिनेटमा लियोन गोरेट्जकाको पासमा लेवान्डोस्कीले गोल गर्दै बायर्नलाई २–० को अग्रता दिलाए । पहिलो हाफको इन्ज्युरी समयको थप गरिएको पहिलो मिनेटमा थोमस मुलरको पासमा लेवान्डोस्कीले व्यक्तिगत दोस्रो गोल गरेपछि बायर्नले पहिलो हाफमा ३–० को अग्रता लिएको थियो ।

५१औं मिनेटमा लेवान्डोस्कीको पासमा मुलरले व्यक्तिगत दोस्रो गोल गरेपछि बायर्नले खेलमा ४–० को अग्रता लिन सफल भयो । ५८औं मिनेटमा रिट्सु डोआनले गोल गर्दै खेललाई ४–१ को अवस्थामा ल्याए । ७६औं मिनेटमा कोरेन्टिन टोलिसो सिधै रातो कार्ड खादै मैदानबाट बाहिरिएपछि बायर्न १० खेलाडीमा समेटियो ।

त्यसपछि थप गोल निस्कन नसक्दा बायर्न फराकिलो जित निकाल्न सफल भयो । जितसँगै बायर्न ४ खेलबाट ९ अंक जोडेर दोस्रो स्थानमा उक्लिएको छ । पराजित अर्मिनिया ४ अंकसहित १४औं स्थानमा छ ।

अन्य नतिजा

अग्सवर्गविरुद्ध आरबी लाइप्जिग (०–२), फ्रेइवर्गविरुद्ध वेर्डर ब्रेमेन (१–१), हर्था बर्लिनविरुद्ध स्टुटगार्ट (०–२), मेइन्जविरुद्ध बायर लिभरकुसन (०–१), होफेनहाइनविरुद्ध बोरुसिया डर्टमुन्ड (०–१) र बोरुसिया मोन्चेनग्लाडवाकविरुद्ध वल्फ्सवर्ग (१–१)