एजेन्सी – इंग्लिस प्रिमियर लिगमा आज राति लेस्टर सिटी र एस्टन भिल्लाबीच प्रतिस्पर्धा हुँदैछ । खेल लेस्टरको मैदान किङ पावर स्टेडियममा राति १२ बजे हुनेछ ।

यि दुवै टोली जित निकाल्दै दोस्रो स्थानमा उक्लने लक्ष्यमा हुनेछ । प्रिमियर लिगमा अपराजित रहेको भिल्लाको ३ खेलबाट ९ अंक रहेको छ । ४ खेलबाट लेस्टरको पनि ९ अंक नै छ । यस्तोमा घरेलु मैदानमा लेस्टर सिटी भिल्लालाई पराजित गर्दै लिभरपुल र भिल्लालाई नै पछि पार्दै दोस्रो स्थानमा उक्लने दाउमा हुनेछ ।

जेमी भार्डी, एयोजी पेरेज, हार्भे बार्नेस, टिमोथी कास्टाग्ने, जोनी इभान्स, वेस्ले फोफना र जेम्स जस्टिनलगायतका खेलाडी लेस्टरसँग हुनेछन् । यस्तै केलिची इहेनाचो र हम्जा चौधरी पनि टोलीसँग रहेका छन् ।

यता, उच्च प्रदर्शन गरिरहेको भिल्ला लेस्टरलाई अर्काे शिकार बनाउने लक्ष्यमा हुनेछ । लिभरपुलमाथिको फराकिलो जितमा ह्याट्रिक पुरा गरेका ओली वाट्किन्स नै टोलीको मुख्य हतियार हुनेछन् । उनलाई ज्याक ग्रेयलिस, ट्रेजेग्वेट, जोन म्याकीन, रस बार्कले र गोलरक्षक इमिलियानो मार्टिनेजले साथ दिनेछन् ।

यि दुई टोली ९ पटक प्रतिस्पर्धा गर्दा ४ खेलमा लेस्टर विजयी भएको छ । ३ खेल भिल्लाले आफ्नो पक्षमा पारेको छ । दुई खेल बराबरीमा सकिएको छ । पछिल्लोपटक लेस्टरले घरेलु मैदानमा भिल्लामाथि ४–० को जित निकालेको थियो ।