एजेन्सी – वेल्सका फरवार्ड ग्यारेथ बेलले टोटेनहम हस्टपरबाट दोस्रोपटक डेब्यु गरेको खेलमा वेस्टह्याम युनाइटेडसँग बराबरीमा रोकिदै अंक बाँडेका छन् ।

टोटेनहमले खेलको सुरुवातको १६ मिनेटभित्र ३–० को अग्रता लिएर पनि जोगाउन नसक्दा ३–३ गोलको बराबरीमा रोकिदै अंक बाड्न बाध्य बनेको हो । टोटेनहममा बेलको दोस्रो इनिङको पहिलो खेल बिर्सन लायक बन्यो । उनी मैदान प्रवेश गर्दासम्म टोटेनहमले खेलमा ३–० को अग्रता लिएको थियो । तर उनी मैदान प्रवेश गरेपछि टोटेनहमले अन्तिम समयमा तीन गोल खान पुगेको थियो ।

टोटेनहम हस्टपर स्टेडियममा आइतबार राति भएको खेलमा टोटेनहमका ह्यारी केनले दुई गोल गर्दा ह्युङ मिन सनले एक गोल थपे । वेस्टह्यामका बल्बुइनाले म्यानुयल लान्जिनीले गोल गर्दा एक गोल उपहार पाएको थियो ।

खेलको ४५ सेकेन्डमै सनले केनको पासमा गोल गर्दै टोटेनहमलाई अग्रता दिलाएका थिए । आठौं मिनेटमा सनको पासमा केनले गोल गरेपछि टोटेनहमले खेलमा २–० को अग्रता लिन सफल भयो । १६औं मिनेटमा सर्जियो रिगुइलोनको क्रसलाई केनले हेडरमार्फत व्यक्तिगत दोस्रो गोल गरेपछि टोटेनहम ३–० ले अघि बढ्यो ।

३५औं मिनेटमा सर्जी औरिएरको क्रसमा सनको प्रहारलाई वेस्टह्यामका गोलरक्षक लुकास्ज फावियन्स्कीले सहजै बचाए । ५०औं मिनेटमा पाब्लो फोर्नल्सको हेडर पोस्टबाट थोरै बाहिरिदा वस्टह्यामले अग्रता घटाउन सकेन ।

७२औं मिनेटमा स्टेभ वर्गवाइनको स्थानमा बेल मैदानमा प्रवेश गरे । उनी २०१३ पछि टोटेनहमको जर्सीमा मैदान प्रवेश गरे । ७९औं मिनेटमा केन ह्याट्रिकबाट चुके । ८२औं मिनेटमा फावियन बल्वुएनाले आरोन क्रेसवेलको पासमा गोल गरेपछि वेस्टह्याम खेलमा फर्किएको थियो ।

८५औं मिनेटमा भ्लादिमिर कोउफलको प्रहारलाई डाभिन्सन सान्चेजले हेडरमार्फत बचाउन खोज्दा आफ्नै पोस्टमा गोल गर्न पुग्दा खेल ३–२ को मोडमा आएको थियो । इन्ज्युरी समयको थप गरिएको पहिलो मिनेटमा बेलले सुवर्ण अवसर पाएपनि गोलरक्षक फावियन्स्कीले बचाए ।

चौथो मिनेटमा म्यानुयल लान्जिनीले गोल गर्दै खेललाई ३–३ गोलको बराबरीमा ल्याए । क्रेसवेलको फ्रिकिकलाई टोटनहमका डिफेन्डरले क्लियर गरेपनि लान्जिनीले पेनाल्टी बक्सबाहिरबाट गरेको प्रहार टप कर्नरबाट गोलमा परिणत हुदा गोलरक्षक लोरिसले रोक्ने कुनै अवसर नै पाएन ।

बराबरीपछि टोटेनहम ५ खेलबाट ८ अंक जोडेर छैटौ स्थानमा रहेको छ । वेस्टह्याम ७ अंकसहित आठौं स्थानमा रहेको छ ।