एजेन्सी – बोस्नियन फरवार्ड जेको चम्कदा इटालियन सिरी ‘ए’ मा रोमाले बेनेभेन्टोमाथि फराकिलो जित निकालेको छ । घरेलु मैदानमा रोमाले १–० ले पछि परेको स्थितिमा बेनेभेन्टोमाथि ५–२ को सहज जित हात पारेको हो ।

रोमामा आइतबार राति भएको खेलमा घरेलु टोलीको जितमा कप्तान इडेन जेकोले दुई गोल गर्दा पेड्रो रोड्रिग्वेज, जोर्डन भेरेटआउट र कार्लेस पेरेजले गोल गरे । बेनेभेन्टोका जियानुलका काप्रारी र जियानलुका लापाडुलाले गोल गरे ।

खेलको पाँचौ मिनेटमा जियानलुका काप्रारीको गोलबाट रोमा पछि परेको थियो । ३१औं मिनेटमा पेड्रोले गाल गर्दै खेललाई १–१ गोलको बराबरीमा ल्याए । ३५औं मिनेटमा जेकोले गोल गर्दै रोमालाई २–१ को अग्रता दिलाए ।

पहिलो हाफको इन्ज्युरी समयको थप गरिएको दोस्रो मिनेटमा हेनरिक मिखटरयानले गोल गरेपनि भिएआरबाट मान्यता पाएन । ५५औं जियानलुका लापाडुलाले गोल गर्दै खेललाई २–२ गोलको बराबराीमा ल्याए । उनको पेनाल्टी रोमाका गोलरक्षक एन्टेनियो मिरान्टेले रोकेपनि रिवाउन्डमा गोल गर्न सफल भएका थिए ।

६९औं मिनेटमा जोर्डन भेरेटआउटले पेनाल्टीमार्फत गोल गर्दै रोमालाई ३–२ को अग्रता दिलाए । ७७औं मिनेटमा जेकोको व्यक्तिगत दोस्रो गोल गरेपछि रोमाले खेलमा ४–२ को अग्रता लिन सफल भयो । ८९औं मिनेटमा कार्लेस पेरेजले गोल गर्दै रोमालाई ५–२ को फराकिलो जित दिलाए ।

जितसँगै रोमा ४ खेलबाट ७ अंक जोडेर सातौ स्थानमा रहेको छ । पराजित भेनेभेन्टो ६ अंकसहित १०औं स्थानमा छ ।