एजेन्सी – युइएफए च्याम्पियन्स लिगको नयाँ सिजनको समूह चरणको पहिलो खेलमा आज (मंगलबार) राति विभिन्न ८ खेलमा प्रतिस्पर्धा हुँदैछ ।

समूह ‘एच’ मा गत सिजनको उपविजेता फ्रान्सेली च्याम्पियन पेरिस सेन्ट जर्मेन (पीएसजी) ले घरेलु मैदानमा इंग्लिस क्लब म्यानचेस्टर युनाइटेडको आतिथ्यता गर्दैछ ।

खेल पार्क दि प्रिन्सेस पेरिसमा नेपाली समयअनुसार राति १२ः४५ बजे हुनेछ । घरेलु मैदानमा युनाइटेडलाई पराजित गर्दै पीएसजी नयाँ सिजनमा सुखद सुरुवात गर्ने लक्ष्यमा हुनेछ । स्टार फरवार्डद्वय ब्राजिली नेयमार र फ्रान्सेली केलियन एमबाप्पे टोलीको मुख्य हतियार हुनेछन् ।

एन्जल डि मारिया, राफिन्हा, एन्डर हेरेरा, इड्रिसा गाना गुआई, लेभिन कुर्जावा, प्रेसनेल किम्पेम्बे, एलसान्द्रो फ्लोरेन्जी र गोलरक्षक केलर नाभास पनि टोलीमा हुनेछन् । यस्तै मोइस किन, पाब्लो साराविया, लियान्द्रो ड्यानियल पारेडेस, मिट्चेल बाक्केर, कोलिन डग्वा र जेसे पनि टोलीमा रहेका छन् ।

यता, युनाइटेड पनि पीएसजीलाई पराजित गर्दै च्याम्पियन्स लिगमा सुखद सुरुवात गर्ने दाउमा हुनेछ । कप्तान ह्यारी मगाएर र फरवार्ड एडिन्सन काभानी टोलीमा हुने छैनन् । एन्थोनी मार्सियल, ब्रुनो फर्नान्डेस, मार्कस रासफोर्ड, जुवान माटा, पल पोग्वा, स्कट म्याकटोमिने, आरोना वान बिसाका, भिक्टोर निल्सन लिन्डेलफ, डोनि भान डि बिक, नेमान्जा माटिच र गोलरक्षक डेभिड डे हेया टोलीमा रहनेछन् ।

यी दुई टोली चौथोपटक प्रतिस्पर्धा गर्न लागेका हुन् । तीन खेलमा पीएजसी दई खेलमा विजयी हुँदा एक खेल युनाइटेडले आफ्नो पक्षमा पारेको छ । २०१९ मार्चमा प्रि–क्वाटरफाइनलमा युनाइटेडले पीएसजीलाई उसकै मैदानमा ३–१ को जित निकालेको थियो । उक्त खेलमा दुई गोल गरेका रोमेलु लुकाकु टोलीमा छैनन् ।

युनाइटेड सोही जितलाई दोहोर्‍याउने दाउमा रहँदा पीएसजी उक्त हारको बदला लिने लक्ष्यमा हुनेछ । त्यसअघि २०१९ फेब्रुअरीमा पीएसजीले युनाइटेडलाई उसकै मैदानमा २–० ले हराएको थियो ।

यही समूहको अर्काे खेलमा जर्मन क्लब आरबी लाइप्जिगले घरेलु मैदानमा टर्किस क्लब इस्तानबुल बसाकसेहिरको सामना गर्दैछ । खेल रेडबुल एरिना लाइप्जिगमा राति १२ः४५ बजे हुनेछ । यि दुई टोली पहिलोपटक भिड्न लागेको हो ।