एजेन्सी – युइएफए च्याम्पियन्स लिगको समूह चरणको पहिलो खेलमा इंग्लिस क्लब चेल्सीले स्पेनिस क्लब सेभियाको आतिथ्यता गर्दैछ ।

खेल स्टामफोर्ड ब्रिजमा नेपाली समयअनुसार राति १२ः४५ बजे हुनेछ । घरेलु टोली चेल्सी बलियो सेभियालाई पराजित गर्दै सुखद सुरुवात गर्ने दाउमा हुनेछ । चेल्सीको यो योजनामा जर्मन खेलाडीद्धय टिमो वेर्नर र काई हाभर्टज मुख्य हतियार हुनेछन् ।

उनीहरुलाई हाकिम जियाच, मासन माउन्ट, जर्गिन्हो, एङ्गोलो कान्टे, बेन चिलवेल, रिस जेम्स, थियागो सिल्भा, सेसर एज्पिलिक्वेटा र कुर्ट जोउमाले साथ दिनेछन् । यस्तै ट्याम्मी अब्राहम, क्रिस्टियन पुलिसिस, ओलिभर जिरुउड, क्यालुम अड्सन ओडोई र एन्ड्रिएस क्रिस्टेन्सेन पनि चेल्सीको टोलीमा रहेका छन् । चोटका कारण गोलरक्षक इडुआर्ड मेन्डीले खेल्ने सम्भावना न्युन रहँदा र किपा एरिजाबालगाले पुन अवसर पाउन सक्नेछन् ।

अग्रपंक्ति र मध्यपंक्तिमा राम्रो भएपनि चेल्सीले डिफेन्स लाइनमा सुधार गर्नुपर्ने छ । प्रिमियर लिगमा साउथह्याम्पटनविरुद्ध ३–० को अग्रता लिएर पनि बराबरीमा रोकिनुपर्दा चेल्सीको डिफेन्स लाइन निकै कमजोर देखिएको थियो ।

यता, गत सिजनको युरोपा लिग च्याम्पियन सेभिया पनि चेल्सीको कमजोर डिफेन्सको फाइदा उठाउदै च्याम्पियन्स लिगमा सुखद सुरुवात गर्ने दाँउमा हुनेछ । सेभियासँग लुकास ओकम्पास, लुक डि जोङ, सुसो, इभान राकिटिच, फर्नान्डो, जोआन जोर्डन, डिएगो कार्लाेस, जेसस नाभास, मार्काेस अकुना, सर्जि गोमेज र गोलरक्ष यासिन बोउनोउ रहेका छन् ।

यस्तै मुनिर इल हाडाडी र युसेफ इन न्यास्री पनि टोलीमा रहेका छन् । यि दुई टोली पहिलोपटक खेल्न लागेका हुन् ।

यही समूह ‘ई’ को अर्काे खेलमा फ्रान्सेली क्लब रेनेसले रसियन क्लब क्रास्नोडरको सामना गर्दैछ । खेल राति १२ः४५ बजे नै हुनेछ ।