एजेन्सी – नयाँ सिजनको युइएफए च्याम्पियन्स लिगमा आज राति क्याटलान क्लब बार्सिलोनाले घरेलु मैदानमा फेरेन्कभारोसको आतिथ्यता गर्दैछ ।

खेल नोउ क्याम्पमा नेपाली समयअनुसार राति १२ः४५ बजे हुनेछ । तुलनात्मक रुपमा कमजोर प्रतिद्धन्द्धी फेरेन्कभारोसमाथि सहज जित निकाल्ने बार्सिलोनाको लक्ष्य हुनेछ ।

कप्तान लियोनेल मेस्सी, अन्सु फाती, एन्टोइन ग्रिजमन, औसमाने डेम्वेले, फिलिपे कौटिन्हो, फ्रान्की डि जोङ, पेड्री, सर्जियो बुस्क्वेट्स, क्लेमेन्ट लेङलेट, जेरार्ड पिके, सर्जि रोबर्टाे, सर्जिन्हो डेस्ट र गोलरक्षक नेटो टोलीमा हुनछन् ।

तर, बार्सिलोनाका प्रशिक्षक रोनाल्ड कोम्यानले फेरेन्कभारोसविरुद्ध दोस्रो रोजाईका खेलाडीलाई मैदान उतार्न सक्नेछन् । च्याम्पियन्स लिग लगत्तै बार्सिलोनाले स्पेनिस ला लिगामा रियल म्याड्रिडसँग तथा त्यसपछि च्याम्पियन्स लिगमै इटालियन महारथी युभेन्ट्ससँग खेल्ने तालिका छ ।

यस्तो अवस्थामा कोम्यानले सिनियर खेलाडीलाई विश्राम दिँदै दोस्रो रोजाईका खेलाडी रोनाल्ड एरुजो, जुनियर फिर्पाे, मिरालेम प्यानिच, रिकी पुच, ट्रिन्काओ र मार्टिन ब्रेथवेटसँगै अन्सु फातीलाई खेलाउन सक्नेछन् ।

यता, एनबी वानको को शीर्षस्थानमा रहेको फेरेन्कभारोस पनि बलियो बार्सिलोनाबाट अंक खोस्ने लक्ष्यमा मैदान उत्रनेछ । इसायल, मेट्रो युजुनी, ओलेक्सान्डर जुवकोभ, लासा डिभाली र गोलरक्षक डेनेस डिबस्ज टोलीमा रहनेछ ।

यही समूह ‘जी’ को अर्काे खेलमा इटालियन महारथी युभेन्ट्सले युक्रेनी क्लब डेनामो किएभको सामना गदै छ । खेल युक्रेनमा राति १२ः४५ बजे नै हुनेछ ।