एजेन्सी – युइएफए च्याम्पियन्स लिगको समूह ‘एफ’ को पहिलो चरणको खेलमा इटालियन क्लब लाजियोले जर्मन क्लब बोरुसिया डर्टमुन्डलाई पराजित गरेको छ । घरेलु मैदानमा मंगलबार राति भएको खेलमा लाजियोले डर्टमुन्डमाथि ३–१ को सहज जित हात पारेको हो ।

स्टेडियो ओलम्पिको रोमामा घरेलु टोलीको सहज जितमा सिरो इमोबिले र जिन ड्यानियल एक्पा एक्प्रोले गोल गर्दा एक गोल उपहार पाएको थियो । डर्टमुन्डका एर्लिङ ब्राउन हालान्डले सान्त्वना गोल फर्काए ।

खेलको छैटौ मिनेटमा नै सिरो इमोबिलेले जुआक्विन कोरेयाको पासमा गोल गर्दै घरेलु टोलीलाई १–० को अग्रता दिलाए । थोमस म्युनियरले बल पोजसन लुज गरेपछि लुकास लेइभाले छोएको बललाई जुआक्विन कोरेयाले मिलाइदिएको पासमा इमोबिलेले क्लोज रेन्जबाट गोल गर्न सफल भएका थिए ।

१२औं मिनेटमा जाडोन सान्चोको क्रसमा लुकास्ज पिस्जेकको हेडर पोस्टबाट थोरै बाहिरिदा डर्टमुन्ड बराबरीबाट चुक्यो । १५औं मिनेटमा प्याट्रिकको क्रसमा सिरो इमोबिलेको प्रहारलाई डर्टमुन्डका गोलरक्षक मार्विन हिट्जले उत्कृष्ट बचाउ गरे ।

२३औं मिनेटमा लाजियोले गोलरक्षक मार्विन हिट्जको आत्मघाती गोलबाट अग्रता दोब्बर बनायो । लुइस अल्बर्टाेको कर्नरलाई लुइज फिलिपेको हेडर गोलरक्षक मार्विन हिट्जलाई छुदै गोलमा परिणत भएको थियो ।

२८औं मिनेटमा एर्लिङ ब्राउट हालान्डको लो कटब्याक पासमा थोमस म्युनियरले गोल गर्न सकेनन् । ४४औं मिनेटमा एक्सेल विस्टेलको २५ यार्ड टाढाको प्रहार लुकास लेइभाले डिफ्लेक्ट हुदै पोस्टतिर पुगेपनि गोलरक्षक थोमस स्ट्राकोसाले नियन्त्रणमा लिन सफल हुदा डर्टमुन्ड गोलअन्तर घटाउनबाट चुक्यो । ५०औं मिनेटमा हालान्डको प्रहारले गोलरक्षक थोमसलाई रोक्न गाह्रो भएन ।

६६औं मिनेटमा जियोभानी रेना, जाडोन सान्चो र मार्काे रिउसको समन्वयमा उत्कृष्ट मुभ बनेपनि राफयल गुरेको २० यार्ड टाढाको प्रहार क्रसबारबाट थोरै बाहिरियो । ७१औं मिनेटमा हालान्डले गोल गर्दै डर्टमुन्डलाई २–१ को अवस्थामा ल्याए । उनले जियोभानी रेनाको पासमा गोल गर्न सफल भएका थिए ।

७६औं मिनेटमा सव्सिच्युट एक्पा एक्प्रोले इमोबिलेको पासमा गोल गरेपछि डर्टमुन्डको सम्भावना टाढियो । ८०औं मिनेटमा हालान्डको प्रहारमा गोृलरक्षक थोमस बाधक बने । इन्ज्युरी समयको थप गरिएको तेस्रो मिनेटमा जुलियन ब्रान्डको क्रसमा सान्चोको प्रहार क्रसबारबाट थोरै बाहिरियो ।

यही समूहको अर्काे खेलमा क्लब ब्रुगले जेनिथमाथि २–१ को जित निकालेको छ । क्लब ब्रुगको जितमा इमन्युयल डेनिस र चार्लेस डि केटेलारेले गोल गरे । जेनिथले आत्मघाती गोल उपहार पाएको थियो ।

यो अवे जितले क्लब ब्रुग शीर्षस्थानमा रहँदा लािजयो दोस्रो स्थानमा रहेको छ । डर्टमुन्ड तेस्रो स्थानमा रहँदा जेनिथ पुछारमा छ ।