एजेन्सी – क्याटलान क्लब बार्सिलोनाले च्याम्पियन्स लिगको समूह चरणको पहिलो खेलमा हंगेरियन क्लब फेरेन्कभारोसमाथि ५–१ को सहज जित पाएको खेलपछि आफ्ना चार स्टार खेलाडीको सम्झौता नविकरण गरेको छ ।

क्लबले क्लबका अनुभवी डिफेन्डर जेरार्ड पिके, गोलरक्षक मार्क आन्द्रे टेर स्टेगन, डिफेन्डर क्लेमेन्ट लेङ्लेट र मिडफिल्डर फ्रान्की डि जोङको सम्झौता नविकरण गरेको हो । सम्झौता अनुसार ३३ वर्षीय स्पेनिस डिफेन्डर पिके २०२४ सम्म बार्सिलोनामा रहनेछन् । उनको रिलिज क्लज ५ सय मिलियन युरो तोकिएको छ ।

यस्तै २८ वर्षीय जर्मन गोलरक्षक मार्क आन्द्रे टेर स्टेगनको सम्झौता २०२५ सम्म लम्ब्याइएको छ । उनको विषयमा क्लबमा लामो समयदेखि नै छलफल भइरहेको थियो । उनको रिलिज क्लज ५ सय मिलियन युरो नै तोकिएको छ ।

यस्तै २५ वर्षीय फ्रान्सेली डिफेन्डर क्लमेन्ट लेङ्लेट र डच मिडफिल्डर फ्रान्की डी जोङको सम्झौता २०२६ सम्मलाई लम्ब्याइएको छ । लेङलेटको ३ सय मिलियन युरो र डी जोङको ४ सय मिलियन युरो रिलिज क्लज तोकेको छ ।

‘यो सम्झौता केहि सातयताको लगातार छलफल र कोभिड–१९ का कारण देखिएको अहिलेको विषम परिस्थितिले निम्त्याएको अस्थायी सुविधाको उपज हो,’ बार्सिलोनाको जारी गरेको विज्ञप्तिमा उल्लेख छ ।