एजेन्सी – युइएफए च्याम्पियन्स लिगको समूह चरणको पहिलो खेलमा आज राति स्पेनिस क्लब रियल म्याड्रिडले घरेलु मैदानमा युक्रेनी क्लब साख्तर डोनेस्कको आतिथ्यता गर्दैछ ।

खेल अल्फ्रेडो डि स्टेफानोमा नेपाली समयअनुसार राति १०ः४० बजे हुनेछ । च्याम्पियन्स लिगको सर्वाघिक सफल रियल म्याड्रिड घरेलु मैदानमा साख्तरलाई पराजित गर्दै सुखद सुरुवात गर्ने योजनामा हुनेछ । तर, साख्तर विरुद्ध कप्तान सर्जियो रामोसले खेल्ने सम्भावना न्युन छ ।

स्पेनिस ला लिगामा क्याडिजसँग १–० ले पराजित भएको खेलमा चोट बोकेका उनी दोस्रो हाफमा मैदान प्रवेश गरेका थिएनन् । यस्तै चोटकै कारण मिडफिल्डर मार्टिन ओडेगार्ड र फरवार्ड इडेन हाजार्ड पनि टोलीमा रहने छैन ।

यस्तो अवस्थामा रियलको रक्षापङ्ति राफयल भरान, इडर मिलिटाओ, नाचो फर्नान्डेज र फर्लान्ड मेन्डीले सम्हाल्ने छ । मार्सेलोले पनि खेल्न सक्नेछ । मिडफिल्डमा क्यासमिरोसँगै लुका मोड्रिच, फेडरिको भाल्भेर्डे र टोनी क्रुस रहनेछ ।

अग्रपङ्तिमा करिम बेन्जेमालाई मार्काे एसेन्सियो र रोड्रिगोले साथ दिन सक्नेछ । भिनिसियर जुनियर, इस्को लुकास भास्क्वेज, लुका जोभिक पनि टोली रहेका छन् । रियलको पोस्ट थिवाउट कोर्टुवाले नै सम्हाल्ने पक्का छ ।

यता, साख्तर पनि रियललाई पराजित गर्दै सुखद सुरुवातको योजनामा हुनेछ । साख्तरका लागि भिक्टोर कोभालेन्को, डेन्टिन्हो, मार्काेस एन्टोनियो, मार्लाेस, टेटे, डुडो र गोलरक्षक एनाटोली ट्रविन टोलीमा रहनेछ ।

यि दुई टोली तेस्रोपटक प्रतिस्पर्धा गर्न लागेको २०१५ मा च्याम्पियन्स लिगको समूह चरणमा यि दुई टोलीले प्रतिस्पर्धा गरेका थिए । एक खेलमा रियल ४–० ले विजयी हुदा अर्काे खेलमा रियल ४–३ ले विजयी भएको थियो । रियल यही जितलाई निरन्तरता दिने दाँउमा रहँदा साख्तर रियलसँगको हारको श्रृंखला तोड्ने दाँउमा हुनेछ ।

यही समूह ‘बी’ को अर्काे खेलमा इटालियन क्लब इन्टर मिलानले घरेलु मैदानमा जर्मन क्लब बोरुसिया मोन्चेनग्लाडवाकसँग प्रतिस्पर्धा गर्दैछ । खेल राति १२ः४५ बजे हुनेछ ।