एजेन्सी – यूईएफए च्याम्पियन्स लिगको सर्वाधिक सफल क्लब रियल म्याड्रिडले यस सिजनको पहिलो खेलमा खराब सुरुवात गरेको छ ।

घरेलु मैदानमा रियल म्याड्रिड शाख्तर डोनेस्कविरुद्ध खेलको पहिलो हाफमा नै ३-० ले पछि परेको हो । यसै साता हुने एल क्लासिकोलाई ध्यानमा राख्दै प्रशिक्षक जिनेदिन जिदानले कमजोर टोली पहिलो रोजाइमा उतारेका थिए । तर डिफेन्सको कमजोर प्रदर्शन र आक्रमणमा चुस्त हुन नसक्दा रियल पहिलो हाफमै तीन गोल खान पुगेको हो ।

खेलको २८ औं मिनेटमा टेटेले गोल गर्दै पाहुना टोलीलाई अग्रता दिलाए । मार्सेलोले गरेको ट्याकलको प्रयास असफल भएपछि भिक्टो कोर्नीएन्कोको पासमा टेटेले गोल गरेका थिए । त्यसअघि मार्लोसले वन भर्सेस वनको अवस्थामा गोल गर्न नसक्दा शाख्तरले अग्रता लिन सकेको थिएन ।

त्यसको तीन मिनेट नबित्दै रियल २-० ले पछि पर्यो । टेटेले पेनाल्टी क्षेत्र बाहिरबाट गरेको प्रहार गोलरक्षक कोर्टुवाले विफल पारेपनि रिबाउन्डमा राफेल भारानले बल बचाउन खोज्दा आफ्नै पोस्टमा छिरेको थियो ।

पहिलो हाफको ३ मिनेट बाँकी रहँदा शाख्तरले ३-० को अग्रता लियो । टेटेले पेनाल्टी क्षेत्रनजिक चलाखीपूर्ण मुभ बनाउँदै ब्याकहिल दिएपछि मानोर सोलोमोनले उत्कृष्ट फिनिस गर्दै घरेलु टोलीलाई स्तब्ध बनाए ।

प्रशिक्षक जिदानले चोटका कारण कप्तान सर्जियो रामोसलाई बाहिर राखेका थिए । मिडफिल्डर टोनी क्रुस, फरवार्ड करीम बेन्जेमा र विंगर भिनीसियस जुनिअर सबै बेन्चमा रहेका छन् । डिफेन्डर ड्यानी कार्भाजल पनि चोटका कारण उपस्थित छैनन् ।