एजेन्सी – रियल म्याड्रिड च्याम्पियन्स लिग अन्तर्गत समूह चरणको पहिलो खेलमा शाख्तर डोनेस्कसँग ३-२ ले पराजित भयो । लिगमा नव प्रवेशी काडिजसँग पराजित भएलगत्तै घरेलु मैदानमा हार बेहोरेपछि जिदानमाथि केहि दबाब छ ।

जिदानले आफू र आफ्नो टोली यस अवास्थाबाट माथि उठ्न हरप्रयास गर्ने बताए । ‘ म आफूलाई यो समस्या हल गर्न सक्षम रहेको बुझ्छु । र म प्रयास पनि गर्नेछु । खेलाडीहरुले पनि मलाई साथ् दिनेछन्,’ जिदानले भने, ‘समस्या समाधानका लागि हामीले विभिन्न योजना ल्याउनेछौं । अहिले हामीले शनिबार हुने एल क्लासिकोबारे सोच्न जरुरि छ ।’

शाख्तरसँग हारपछि जिदान केहि खेलाडीको प्रदर्शनलाई लिएर सन्तुष्ट छैनन् । ‘ हारका कारण हामीलाई पक्कै नराम्रो लागेको छ । धेरै कारणहरुले गर्न हार बेहोर्नुपर्यो । हामीले पहिलो गोलमा आफैं गल्ति गर्यौं । त्यसपछि मनोबल उच्च नहुनु, खेलमा डटेर नलाग्नुले नै असर गर्यो ।’

‘दोस्रो हाफमा केहि खेलाडीले अवस्था बुझे र राम्रो प्रदर्शन गरे । केहि खेलाडी यो नतिजाको हकदार छैनन् । हाम्रो लागि खराब खेल र खराब रात रहयो । म प्रशिक्षक हुँ, र यो समस्याको समाधान मैले खोज्नुपर्छ । म आज नै यो गर्ने भने छैन ।’

क्याडीजविरुद्ध पनि पहिलो हाफको प्रदर्शन कमजोर रहेको थियो । शाख्तरविरुद्ध पनि सोहि कुरा दोहोरिंदा उनले आफूलाई एकपटक प्रश्न सोध्ने बेला आएको छ । जिदान भने पहिलो गोल खानुले खेलाडीलाई असर गरेको बुझाइ राख्छन् ।

‘म यसको जिम्मेवार छु । पहिलो हाफ सकारात्मक प्रदर्शन नहुनुले पनि मैले गल्ति गरेजस्तो लग्यो । सुरुवाती गोलले नै खेलको रुप बदल्दियो । तर प्रतियोगिता भर्खर सुरु भयो । हामी अझै मिहिनेत गर्नेछौं ।’

पछिल्लो दुई नतिजाको असर शनिबार हुने एल क्लासिकोमा पर्नेमा समर्थकहरु चिन्तित छन् । तर जिदान भने यसलाई सहज रुपमा लिन्छन् । ‘म अरुले के भन्छन् भनेर सुन्दिन । हामी शनिबार ४ बजे खेलका लागि तयार हुनेछौं । अहिले हाम्रो लागि विश्राम गर्ने हो ।’