एजेन्सी – फ्रान्सेली फरवार्ड एन्टोइन ग्रिजमन गत सिजन एटलेटिको म्याड्रिड छाडेर बार्सिलोना पुगे । पहिलो सिजनमा अपेक्षित प्रदर्शन गर्न नसकेका उनले दोस्रो सिजन पनि सुरुवातमा जम्न सकेका छैनन् ।

आर्सनलका पूर्व प्रशिक्षक आर्सेन वेंगरका अनुसार सुपरस्टार तथा कप्तान लिओनेल मेस्सीका कारण ग्रिजमन बार्सिलोनामा जम्न सकिरहेका छैनन् । ग्रिजमन १ सय २० मिलियन युरोमा बार्सिलोना आएका थिए । पहिलो सिजन बार्सिलोना उपाधिविहिन रहंदा उनको प्रदर्शन बिर्सनलायक रहयो ।

ग्रिजमनले यस सिजन पनि सुरुवाती ४ खेलमा गोल गर्न सकेका छैनन् । च्याम्पियन्स लिग अन्तर्गत फेरेन्कभारोसविरुद्ध खेलमा उनी बेन्चमा नै सिमित रहे । हालसम्म उनले जम्मा एक पटक पोस्टमा प्रहार गरेका छन् । जवाफमा मेस्सीले यस सिजन ७ पटक पोस्टमा प्रहार गर्दै १ गोल गरेका छन् ।

वेंगरका अनुसार ग्रिजमनले उत्कृष्ट प्रदर्शन गर्ने सेन्टर फरवार्डको भूमिकामा मेस्सीले खेल्दा फ्रा न्सेली फरवार्डको प्रदर्शन देख्न पाइएको छैन । ‘लामो समय आफ्नो पोजिसनमा खेल्न नपाउँदा खेलाडीको प्रदर्शन घट्छ । सुरुवातमा नयाँ पोजिसनमा अखेलं राजि भएपनि त्यसको माग पूरा गर्न सहज हुँदैन । अहिले उनले सेन्टरमा खेल्न जरुरि छ,’ वेंगरले भने, ‘ ग्रिजमनको खेल्ने शैली र टोलीको मागले पनि यो ठिक हुन्छ । तर मेस्सीले पनि यहीं खेल्ने हुनाले समस्या छ ।’

ग्रिजमनले गत सिजन ३५ लिगमा ९ गोल र ४ असिस्ट गरेका थिए । ग्रिजमनले समग्रमा १५ गोल गर्न सफल रहे । एटलेटिकोमा रहँदा २ सय ५७ खेल खेल्दै १ सय ३३ गोल गरेका उनले बार्सिलोनामा भने सोहि लय समात्न कठिन हुने देखिन्छ ।