एजेन्सी – लगातार दुई हारपछि रियल म्याड्रिड जितको लयमा फर्कने प्रयास स्वरुप अभ्यासमा जुटेको छ । ला लिगामा काडिज र च्याम्पियन्स लिगमा शाख्तार डोनेस्कसँगको हारपछि शनिबार एल क्लासिकोमा रियलले बार्सिलोनाको सामना गर्दैछ ।

एल क्लासिकोका लागि रियलले बिहीबार प्रशिक्षण गरेको थियो । धेरैको कौतुहलता कप्तान सर्जियो रामोस एल क्लासिकोमा हुने छन् कि छैनन् भन्नेमा बढी केन्द्रित छ । घुडाँको चोट कारण उनी काडिजविरुद्धको खेलमा मध्यान्तरमा परिवर्तन भएका थिए ।

शाख्तार डोनेक्ससँगको खेल भने उनले स्टान्डमा बसेर हुर्नुपरेको थियो । उनी विना रियलले घरेलु मैदानमा शाख्तारको सामना गरेको थियो । युरोपियन प्रतिस्पर्धामा कप्तान विना रियलले खेलको ८ मध्य ७ खेलमा पराजय भोगेको थियो ।

भाल्डेबासमा बिहीबार रामोसले एक्लै अभ्यास गरे । उनले बल र विना बल पनि अभ्यास गरेका थिए । एल क्लासिको भन्दा अघिल्लो दिन शुक्रबार हुने अभ्यासमा भने उनी टोलीका अन्य खेलाडीसँग सामेल हुने अभ्यास गर्ने अपेक्षा गरिएको छ ।

रोमोसविना बार्सिलोनाविरुद्ध उत्रनु परेको खण्डमा टोलीका लागि त्यो चुनौतीपूर्ण हुने अपेक्षा गरिएको छ । उनी शत प्रतिशत दिएर खेल्ने खेलाडी हुन् । ३४ वर्षे सेन्ट्रल ब्याकको प्रतिबद्धतामाथि कसैलाई पनि शंका छैन ।

यदि उनी बार्सिलोनाविरुद्ध उपलब्ध भएमा एल क्लासिकोमा उनको त्यो ४५ औं खेल हुनेछ । यसअघि नै बढी एल क्लासिकोमा उनको नाममा कीर्तिमान छ ।

अन्य खेलाडी पनि चोटग्रस्त

प्रशिक्षक जिनेदिन जिदानका लागि रामोस मात्र होइन अन्य खेलाडीको चोट पनि टाउको दुखाईको विषय बनेको छ । मारियानो, इडन हाजार्ड, डानी कार्भाजाल, मार्टिन ओडेगार्ड र अल्भारो अड्रिअजोला पनि चोटग्रस्त छन् । यद्दपी उनीहरु सबै बिहीबारको अभ्यासमा सामेल भएका थिए ।

आउने खेललाई मध्यनजर गर्दै उनीहरु तयारीमा जुटका हुन् । एल क्लासिकोको तीन दिन पछि समुह बीमा रहेको रियल च्याम्पियन्स लिगअन्तर्गत बोरुसिया मोन्चाग्लाडवाचसँगको खेलका लागि जर्मनी जानेछ ।