एजेन्सी – इटालियन क्लब एसी मिलानले युइएफए युरोपा लिगमा विजयी शुरुवात गरेको छ । मिलानले स्कटिस क्लब सेल्टिकलाई उसकै मैदानमा ३–१ ले पराजित गरेको हो ।

सेल्टिक पार्क ग्लास्कोमा बिहीबार राति भएको खेलमा मिलानको जितमा राडे क्रुनिक, ब्राहिम डियाज र जेन्स पिटर हगले गोल गर्दा सेल्टिकका मोहम्मेद इलयोनोउसीले गरेको गोल सान्वना बन्यो ।

खेलको १४औं मिनेटमा स्यामुइल क्यास्टेलेजोको पासमा राडे क्रुनिकले गोल गर्दै मिलानलाई अघि बढाएका थिए । ४२औं मिनेटमा थियो हर्नान्डेजको पासमा ब्राहिम डियाजले गोल गरेपछि मिलानले पहिलो हाफमा २–० को अग्रता लिन सफल भएको थियो ।

७६औं मिनेटमा घरेलु टोलीका मोहम्मेद इलयोनोउसीले गोल गर्दै खेलमा फर्कने संकेत दिएका थिए । तर, अन्तिम समयमा एलेक्सिसको पासमा जेन्स पिटरले गोल गर्दै मिलानलाई ३–१ को जित दिलाए ।

यही समूहको अर्काे खेलमा युसुफ याजीसिको ह्याट्रिकमा फ्रेन्च क्लब लिलले १० खेलाडीमा समेटिएको चेक रिपब्लिक क्लब स्पार्टा प्रागमाथि ४–१ को सहज जित हात पारेको छ ।

स्पार्टा प्रागका लाडिस्लाभ क्रेजेसी २३औं मिनेटमा सिधै रातो कार्ड खादै मैदानबाट बाहिरिएपछि सबै पाँचा गोल सम्भव भएको थियो । ४५औं मिनेटमा युसुफले गोल गर्दै लिललाई अग्रता दिलाए । ४७औं मिनेटमा घरेलु टोलीका बोरेक डोक्कलले गोल गर्दै खेललाई बराबरीमा ल्याए ।

६०औं मिनेटमा युसुफले व्यक्तिगत दोस्रो गोल गर्दै लिललाई पुनः २–१ को अग्रता दिलाए । ६६औं मिनेटमा जोनाथन इकोनले गोल गर्दै खेललाई ३–१ को अवस्थामा ल्याए । ७५औं मिनेटमा युसुफले ह्याट्रिक पुरा गर्दै ४–१ को जित दिलाए ।

यस्तै समूह ‘ए’ मा इटालियन क्लब रोमाले स्वीस क्लब योङ ब्वाइजमाथि २–१ को जित दर्ता गरेको छ । रोमाले योङ ब्वाइजमाथि उसकै मैदानमा २–१ को पूनरागमन जित हात पारेको हो । जिन पिएरेको पेनाल्टी गोलमार्फत योङ ब्वाइजले अग्रता लिएको थियो ।

६९औं मिनेटमा रोमाका ब्रुनो पेरेसले बराबरी गोल फर्काए । ७४औं मिनेटमा मारस कुम्वुलाले गोल गर्दै रोमालाई २–१ को जित दिलाए ।

यही समूहको अर्काे खेलमा रोमानियाको क्लब सिएफआर क्लजले बुल्गेरियन क्लब पीएफसी सिएसकेए सोफियामाथि २–० को जित निकालेको छ ।