एजेन्सी – स्पेनिस क्लब भिल्लारियलले युरोपा लिगको समूह चरणको पहिलो खेलमा टर्किस क्लब सिभास्पोरमाथि रोमाञ्चक जित निकालेको छ । घरेलु मैदानमा ८ गोल भएको खेलमा भिल्लारियलले सिभास्पोरमासथ ५–३ को जित निकालेको हो ।

भिल्लारियलमा बिहीबार राति भएको खेलमा घरेलु टोलीको जितमा पाको अल्कासेरले दुई तथा ताकेफुसा कुवो, कार्लाेस बाका र जुवान फोयथले गोल गरे । पाहुना टोलीका ओलारेनवाजु कायोडे, मुस्ताफा याटाबारे र म्याक्स एलाइन ग्राडेलले गोल गरे ।

प्रतिस्पर्धात्मक खेलको १३औं मिनेटमा यसै समरमा स्पेनिस क्लब रियल म्याड्रिडबाट भिल्लारियल पुगेका जापनी मिडफिल्डर ताकेफुसा कुवोको गोलबाट घरेलु टोलीले अग्रता लिएको थियो । २०औं मिनेटमा ताकेफुसा कुवोकै पासमा कार्लाेस बाकाले गोल गर्दै भिल्लारियलको अग्रता दोब्बर पारे ।

३३औं मिनेटमा ओलारेनवाजु कायोडेले गोल गर्दै खेललाई २–१ को अवस्थामा ल्याए । ३७औं मिनेटमा बाका पेनाल्टीमा चुके । ४३औं मिनेटमा मुस्ताफाले गोल गर्दै खेललाई २–२ गोलको बराबरीमा ल्याए ।

५७औं मिनेटमा कुवोको पासमा जुवान फोयथले गोल गेपछि भिल्लारियलले खेलमा पुनः ३–२ को अग्रता लिन सफल भयो । ६४औं मिनेटमा म्याक्स एलाइन ग्राडेलले गोल गर्दै खेललाई ३–३ गोलको बराबरीमा ल्याए ।

त्यसपछि सब्सिच्युट पाको अल्कासेरले मैदान प्रवेश गरेको ८ मिनेटको अन्तरमा दुई गोल गर्दै भिल्लारियललाई ५–३ को रोमाञ्चक जित दिलाए । उनले ७४औं र ७८औं मिनेटमा गोल गरेका थिए । उनी ७०औं मिनेटमा कार्लाेस बाकाको स्थानमा मैदान छिरेका थिए ।

यही समूह आईको अर्काे खेलमा इजरायली क्लब माकावी टेल एभिभले अजरवैजानको क्वारावाग एफकेलाई १–० ले हराएको छ ।