एजेन्सी – रियल म्याड्रिड र बार्सिलोना दुवै क्लब इतिहासकै कठिन समयबाट गुज्रिरहेका छन् । दुवै टोलीको युरोपमा दबदबा छैन, घरेलु लिगमा संघर्षरत छन् र दिन प्रतिदिन टोली कमजोर हुँदै गइरहेको छ ।

रियल र बार्सिलोना दुवैले टोलीमा परिवर्तन गर्ने प्रयास गरिरहँदा त्यसमा सफलता हासिल गर्न सकेका छैनन् । अनुभवी खेलाडीभन्दा युवा खेलाडीमा दुवै टोलीको विश्वास बढ्दो छ । शनिबार हुने एल क्लासिकोमा पनि यसपटक युवा खेलाडीकै दबदबा रहने सम्भावना छ । क्लासिकोमा यसपटक यसअघि कल्पना समेत नगरिएको स्थिति आउन सक्छ ।

युवा खेलाडीमा विश्वास गर्ने अवस्था बार्सिलोनामा बढी देखिन्छ । टिनएजमै रहेका अन्सु फाती र पेड्री बार्सिलोनाको आक्रमणमा निर्णायक भूमिका खेल्दै आएका छन् । यसबाहेक सर्जिनो डेस्ट र फ्रेन्की डे जोङ पनि बेन्चमा रहने सम्भावना छ ।

यी खेलाडीसँगै बेन्चमा थप युवा प्रतिभा देख्न सकिनेछ । त्रिन्काओ, ओस्मान देम्बेले, रोनाल्ड अराउजो, कार्लेस एलेना र रिकी पुज बेन्चमा रहनेछन् । बार्सिलोनाले युवा प्रतिभा आबद्ध गर्न मोटो रकम खर्चंदै आएको छ । ला मासियाबाट भन्दा अन्य क्लबबाट किन्ने प्रवृतिको आलोचना पनि भएको छ ।

यता रियल म्याड्रिडले पनि यू-२३ उमेर समूहका ७ खेलाडीलाई सिनियर टोलीमा प्रयोग गर्दै आएको छ । कम उमेर भएपनि फेडे भालभेर्डे र भिनिसियस जुनिअरले टोलीमा बलियो छाप बसाएका छन् । जिदानको योजनामा दुवै खेलाडी उत्कृष्ट प्रदर्शन गर्दै आएका छन् र पहिलो रोजाईमा पर्नेमा ढुक्क छन् ।

यसबाहेक ब्राजिलियन विंगर रोड्रीगो पनि सुरुवाती रोजाईमा खेल्न दाबेदार हुन् । डिफेन्डर इडर मिलिसाओले कप्तान सर्जियो रामोसको अनुपस्थितिमा डिफेन्स सम्हाल्ने गरेका छन् । यस्तै मोटो रकममा आबद्ध भएका फरवार्ड लुका जोभिचले सोचे अनुरुप प्रदर्शन गर्न नसकेपनि त्यो क्षमता भने राख्दछन ।