एजेन्सी – युभेन्ट्सविरुद्ध च्याम्पियन्स लिगअन्तर्गत समुह चरणको खेलका लिओनल मेस्सीको कप्तानीमा बार्सिलोना इटाली पुगिसकेको छ । अर्कोतिर युभेन्ट्सका सुपरस्टार क्रिस्टियानो रोनाल्डो भने कारोना परिक्षणको नेगेटिभ परिणामको प्रतिक्षामा छन् । बार्सिलोना र युभेन्ट्सबीच बुधबार प्रतिस्पर्धा हुँदैछ ।

पोर्चुगल राष्ट्रिय फुटबल टोलीको जिम्मेवारी निर्वाह गर्ने क्रममा दुई साता अघि रोनाल्डोलाई कोरोना संक्रमण देखिएको थियो । जसका कारण उनले ३ खेल गुमाइसकेका छन् । लक्षण विना र ठीक हुँदाको अवस्थामा पनि कोरोना पोजेटिभ दोस्रो पटक पनि देखिउनु भने रोनाल्डोका लागि निराश बनाउने विषय बनेको छ ।

रोनाल्डो विना कमजोर

युभेन्ट्सले आइतबार हेल्लास भेरोनाविरुद्ध संघर्ष गर्नुपरेको थियो । रोनाल्डो विनाको त्यो खेल १–१ को बराबरीमा टुंगिएको थियो । जसका कारण टोलीले सिरि एमा सिजन निकाल्न अझै प्रतिक्षा गर्नुपर्ने भएको छ ।

पछिल्लो दुवै बराबरीमा रोनाल्डो थिएनन् । क्रोटोनेविरुद्धको अवे खेलमा पनि युभेन्ट्सले बराबरी खेलेको थियो । यद्दपी टोलीले च्याम्पियन्स लिगमा भने जित दर्ता गराएको थियो । तर, नेपोलीबाट वाकओभर पाएको खेलमा युभेन्ट्सलाई ३–० को जित दिइएको थियो ।

युभेन्ट्सले सिरि एमा पछिल्लो तीन खेल जित्न सकेको छैन । टोलीले भेरोना, क्रोटोने र रोमासँग बराबरी खेलेको थियो । टोलीको अहिलेको प्रर्दशन हेर्दा पनि युभेन्ट्समा रोनाल्डोको अभाव प्रष्ट देखिन्छ ।

खराब सुरुवात

५ राउन्डको खेल सकिदा युभेन्ट्सको खातामा ९ अंक मात्रै छ । जुन टोलीको पछिल्लो एक दशकको दोस्रो खराब प्रदर्शन हो । मासिमिलियानो एलिग्री प्रशिक्षक बनेको दोस्रो सिजन टोलीले ५ खेलमा ५ अंक मात्र बटुलेको थियो । तर, त्यति बेला टोलीले उत्कृष्ट पुनरागमन गर्दै उपाधि जितेको थियो ।

साना टोलीविरुद्ध समस्या

एलिग्रीले भन्ने गरेका थिए सिरि एको मध्य वा अन्त्यतिर पुग्दा मात्र उपाधि कसले जित्ने भन्ने प्रष्ट देखिने बताएका थिए । तर अहिलेको अवस्थामा युभेन्ट्सले सफल नतिजाका लागि संघर्ष गरिरहेको छ ।

सिरिएमा युभेन्ट्सले रोनाल्डो विना १४ खेल खेलेको छ । जसमा ७ जित, ३ बराबर र ४ खेलमा हार बेहोरेको छ । कमजोर मानिएका टोली मध्य स्पाल र साम्पडोरियासँग पराजित भएको युभेन्ट्स लिसेसँग बराबरीमा रोकिएको थियो ।

नेगेटिभ रिपोर्टको प्रतिक्षा

बार्सिलोनासँग खेल्नका लागि मात्र होइन सिरि एकै कारणले पनि रोनाल्डो छिटो खेलमा फर्कन चाहन्छन् । तर, त्यसका लागि उनको पछिल्लो परिक्षण नेगेटिभ आउनुपर्ने हुन्छ । रोनाल्डोले स्पेन छाडेयता यी मेस्सी र उनको भेट भएको छैन ।

फेरि एक पटक यी दुई सुपर स्टार एकअर्काविरुद्ध उत्रता पक्कै पनि फुटबलप्रेमी खुसी हुने छन् नै । तर, त्यसका लागि कोरोना परिक्षणको रिपोर्ट कस्तो आउँछ रोनाल्डो खेल्ने नखेल्ने त्यसमा निर्भर रहन्छ । सिरिएमै संघर्ष गरिरहेको युभेन्ट्सले अर्को खेलमा स्पेजियासँग प्रतिस्पर्धा गर्दैछ ।