एजेन्सी – युवा फरवार्ड मार्कस रासफर्डले वैकल्पिक खेलाडीको रुपमा मैदान प्रवेश गरेर दोस्रो हाफमा नै ह्याट्रिक प्रहार गरेपछि म्यानचेस्टर युनाइटेडले यूईएफए च्याम्पियन्स लिगमा जर्मन प्रतिद्वन्द्वी आरबी लाइप्जिगमाथि ५-० को सानदार जित दर्ता गरेको छ ।

खेलको पहिलो हाफमा नै मेसन ग्रीनवुडले घरेलु टोलीलाई अग्रता दिलाएका थिए । उनले २१ औं मिनेटमा पल पोग्बाको उत्कृष्ट पासलाई नियन्त्रणमा लिँदै सटिक फिनिसिङको नमुना प्रस्तुत गर्दै गोल गरेका थिए । पहिलो हाफमा ग्रीनवुडकै अर्को प्रहार गोलरक्षक पिटर गुलाचीले विफल पार्दा मार्सियलको प्रहारमा पनि उनी बाधक बने ।

दोस्रो हाफमा युनाइटेडले रासफर्डलाई मैदान प्रवेश गराएपछि खेलको रुप नै बदलियो ।

खलेको तीन मिनेट समय बाँकी रहँदा मार्सियललाई पेनाल्टी क्षेत्रभित्र लडाएपछि युनाइटेडले पेनाल्टी प्राप्त गर्यो । तर रासफर्डले आफ्नो ह्याट्रिक पूरा गर्नुभन्दा मार्सियललाई सिजनको पहिलो गोल प्रहार गर्ने अवसर सुम्पिए । फ्रान्सेली फरवार्ड त्यसना सफल पनि भए । तर इन्ज्युरी समयको दोस्रो मिनेटमा रासफर्डले आफ्नो ह्याट्रिक पूरा गर्दै युनाइटेडलाई ५-० को सानदार जित दिलाए ।

त्यसअघि बुधबार नै पेरिस सेन्ट जर्मेन (पीएसजी) ले इस्तानबुल बसकसेइरलाई पराजित गरेको थियो । मोइस किनले दुई गोल गरेपछि फ्रान्सेली टोली २-० को जित दर्ता गर्न सफल रहयो ।

प्रिमियर लिगको क्लब एभर्टनबाट लोनमा पेरिस पुगेका इटालियन फरवार्ड किनले दुवै गोल दोस्रो हाफमा गरेका थिए । उनलाई दुवै गोलमा युवा फरवार्ड किलियन एम्बाप्पेले असिस्ट दिएका थिए ।

किनले खेलको ६४ औं मिनेटमा एमबाप्पे क्रसमा हेडरमार्फत गोल गर्दै टोलीलाई अग्रता दिलाए । ७९ औं मिनेटमा एमबाप्पेको पास पेनाल्टी क्षेत्रभित्र प्राप्त गरेपछि किनले उत्कृष्ट टर्न गर्दै गोल गरेका थिए ।

खेलको पहिलो हाफमा नै सुपरस्टार फरवार्ड नेयमार चोटका कारण बाहिरिएका थिए । उनको मांशपेशीमा समस्या आएपछि २६ औं मिनेटमा नै पाब्लो सरबिया उनको स्थानमा मैदान छिरेका थिए । उनको चोटको अब बिहिबार विस्तृत परिक्षणपछि मात्र कति समय बाहिर रहने भन्ने यकिन हुनेछ ।

पीएसजी पहिलो खेलमा म्यानचेस्टर युनाइटेडसँग घरेलु मैदानमा पराजित भएको थियो । उक्त खेलमा हार बेहोरेपनि पीएसजीले जित हासिल गर्दै उपाधि जित्ने लक्ष्यलाई केहि सघाउ गरेको छ ।

अंक तालिकामा म्यान्चेस्टर युनाइटेडको २ खेलमा ६ अंक छ । पीएसजी र लाइप्जिगको समान ३-३ अंक छ भने इस्तानबुल अंकविहिन छ ।

यो पनि : युभेन्टसको मैदानमा बार्सिलोना विजयी