एजेन्सी – इंग्लिस प्रिमियर लिगो आठौं चरणको खेलमा लन्डन क्लब चेल्सीले घरेलु मैदानमा सेफिल्ड युनाइटेडसँग प्रतिस्पर्धा गर्दैछ । खेल स्टामफोर्ड ब्रिजमा राति ११ः१५ बजे हुनेछ ।

अंक तालिकाको सातौ स्थानमा रहेको चेल्सी घरेलु मैदानमा सेफिल्डलाई पराजित गर्दै अंक तालिका सुधार गर्ने दाँउमा हुनेछ । चेल्सीको ७ खेलबाट १२ अंक रहेको छ । लिभरपुलसँग २–० ले पराजित भएयता पछिल्लो १० खेलमा अपराजित रहेको चेल्सी सोही अपराजित यात्रा कायम गर्ने लक्ष्यमा समेत हुनेछ ।

टिमो वेर्नर टोलीका लागि मुख्य हतियार हुदा गोलरक्षक इडुआर्ड मेन्डी पनि टोलीका लागि महत्वपुर्ण खेलाडी हुनेछन् । मेन्डी र चेल्सीले पछिल्लो ५ खेलमा गोल खाएको छैन । कोरोना संक्रमणका कारण मिडफिल्डर काई हार्भटज टोलीमा हुनेछैनन् ।

तर चेल्सीसँग एङ्गोलो कान्टे, हाकिम जियाच, मासन माउन्ट, ट्याम्मी अब्राहम, थियागो सिल्भा, बेन चिलवेल, कुर्ट जोउमा, रिस जेम्स र जर्गिन्होजस्ता खेलाडी रहेका छन् । यस्तै इमर्सन, माटियो कोभासिस, ओलिभर जिरुउड र एन्टेनियो रुडिगर पनि टोलीमा रहेका छन् ।

यता, सेफिल्ड चेल्सीलाई स्तब्ध पार्दै प्रिमियर लिगमा पहिलो जितको खोजीमा हुनेछ । सेफिल्ड १ अंक जोडेर पुछारमा रहेको छ । ओलिभर म्याकब्रुन, रिहान ब्रेस्टर, ओलिभर नरवुड, जोन इगान र गोलक्षक आरोन राम्सदाले टोलीमा छन् ।