एजेन्सी – रियल म्याड्रिडका प्रशिक्षक जिदाने जिदानले भ्यालेन्सियासँगको लज्जास्पद हारको जिम्मेवार आफूले लिने बताएका छन् । पछिल्ला केहि खेलमा ला लिगामा लयमा देखिएको रियललाई आइतबार भ्यालेन्सियाले भने ४–१ ले हराएको थियो ।

रियलले ३ पेनाल्टीमा र अर्को आत्मघाती गोलको सामना गरेको थियो । करिम बेन्जेमाको गोलबाट अग्रता लिएपनि रियल त्यसपछि खेलमा फर्कन पूर्ण रुपमा असफल भएको थियो ।

‘गोलपछि हामी रक्षापक्तिमा पूर्ण रुपमा असफल भयौं । हामीले जसरी खेलिरहेका थियौं त्यसमा पनि परिवर्तन भयो,’ जिदानले खेलपछि भने, ‘हाम्रा लागि सबै भयो । साच्चै भन्नुपर्दा हाम्रो खेल बुझ्न नै कठीन भयो । तर , त्यो सबैको जिम्मेवार म हो । मैले समस्याको समाधान निकाल्नुपर्दछ ।’

हारमा कुनै वहाना गर्न नमिल्ने पनि जिदानले बताए । ‘पहिलो गोलपछि हाम्रो रक्षापंक्तिले लय गुमायो । सबै गल्ती एकैपटक भयो,’ उनले भने, ‘साँचो भन्नुपर्दा हाम्रो रक्षापपंक्ति कसरी खेलिरहेको थियो भन्ने नै थाहा छैन ।’

पहिलो रोजाईका इडेन हाजार्ड र कासिमेरोलाई कोरोना संक्रमण भएपछि उनले इस्को र मार्सेलोलाई पहिलो रोजाईमा राखेका थिए । त्यो निर्णयको भने जिदानले बचाउ गरे । उनले भने, ‘यसमा पछुताउनु पर्ने केहि छैन । सबै रियलका खेलाडी हुन् र मैले पहिलो रोजाई छानें ।’

आइतबारको हारअघि च्याम्पियन्स लिगसहित ला लिगामा गरि ४ खेलम रियल अपराजित रहेको थियो । ८ खेलमा ५ जित १ बराबर र २ हार बेहोरेको रियल १६ अंक सहित अंक तालिकाको चौथो स्थानमा छ ।

रियल सोसिडाड (२० अंक), भिल्लारियल (१८) र एट्लेटिको म्याड्रिड (१७) शीर्ष तीन स्थानमा रहेका छन् । एक दिन अघि सानदार जित निकालेको बार्सिलोना ११ अंकसहित आठौं स्थानमा छ ।