एजेन्सी – पेरिस सेन्ट जर्मेन (पिएसजी) र क्लबका निर्देशक लियोनार्दो टोलीका सुपरस्टारद्वय केलियन एमबाप्पे र नेयमारलाई गुमाउन चाहदैनन् । त्यसैले उनीको सम्झौता नविकरणका विषयमा प्रयास भइरहेको बताइएको छ ।

एमबाप्पे र नेयमार दुवैको अहिलेको सम्झौता सन् २०२१ को जुनमा समाप्त हुँदैछ । त्यसअर्थ क्लब उनीहरुसँग लामो सम्झौताका लागि प्रयासरत रहेको बताइन्छ ।

कोरोना भाइरसको महामारीका कारण अहिले फुटबल क्लबको आर्थिक अवस्था राम्रो छैन । पिएसजी पनि त्यसबाट अछुतो छैन । आर्थिक कारणले नेयमार र एमबाप्पेको भविष्यमा सिधा ठूलो असर त पर्नेछैन ।
ब्राजिलियन स्टारले भने पिएसजीमा सम्झौता नविकरणका लागि तयार रहेको जनाइसकेका छन् । एमबाप्पेको हकमा भने लिग वन च्याम्पियन क्लब ढुक्क हुन सकेको छैन । त्यसकारण पनि क्लबको चासो उनीमाथि बढी रहेको छ ।

एमबाप्पले नयाँ क्लब जान चाहेको बेला बेला सार्वजनिक हुने गरेको छ । यद्दपी विश्व कप विजेताले आउने दिनमा के गर्छन् अहिले स्पष्ट छैन । लियोनार्दोले भने क्लबका ठूला नामका खेलाडी उपाधि जित्ने लक्ष्यका साथ क्लबमै रहने विश्वास लिएका छन् । यद्दपी उनीहरुलाई क्लबमा राख्न सहज भने पक्कै हुने छैन ।

विश्व फुटबलका उत्कृष्ट मानिएका मध्ये रियल म्याड्रिय वा बार्सिलोना कसैको पनि अहिलेको अवस्थामा आर्थिक अवस्था मजबुत छैन । फ्रान्सेली टोलीले युरोपियन फुटबलमा दबदबा कायम राख्ने अपेक्षा राखेको छ । त्यसका लागि नेयमार र एमबाप्पे टोलीका मुख्य हतियार हुन् । अघिल्लो सिजन जस्तै यसपटक पनि टोलीले च्याम्पियन्स लिगको फाइनलको यात्रा तय गर्नेमा क्लब आशावादी छ ।

‘आउने ५ वर्षमा पिएसजीले सबैलाई हराउने छ’, लियोनार्दोले भनेका छन्, ‘फुटबल एउटा चक्र हो । क्लबहरुको सुखद दिन पनि आउँछ । अहिले भने सबैका लागि कठीन समय हो ।’

क्लबको खेलकुद परियोजनाका लागि एमबाप्पे उच्च प्राथमितामा रहेका खेलाडी हुन् । त्यसैले पिएसजी उनलाई गुमाउन चाहदैन । नेयमारले सम्झौता बढाउनेछन् । उनी र उनका बाबु क्लबको परियोजनालाई नजिकबाट नियालिरहेका छन् । उनले यहि क्रममा थुप्रै प्रायोजक पनि पाएका छन् ।

वार्षिक रुपमा उनी ३७ मिलियन युरो कमाईरहेका छन् । २८ वर्षे उनी विश्व फुटबलमा सर्वाधिक कमाउने खेलाडीको दोस्रो नम्बरमा छन् । क्लब र सहरका कारण नेयमार पेरिसलाई आफ्नो घर जस्तै मान्छन् भन्ने बुझाई रहेको छ ।