एजेन्सी – सिरी ‘ए’ प्रतिद्धन्द्धी रोमामाथि अतिरिक्त समयमा जित निकाल्दै स्पेजिया कोपा इटालियाको क्वाटरफाइनलमा प्रवेश गरेको छ ।

स्पेजियाले ९ खेलाडीमा समेटिएको रोमामाथि अतिरिक्त समयमा ४–२ को जित निकाल्दै अन्तिम आठको यात्रा तय गरेको हो । स्पेजियाको क्वाटरफाइनल यात्रामा रिकार्डाे सापोनाराले दुई तथा एन्ड्रे गालाविनोभ र ड्यानिले भर्डीले समान एक गोल गरे । रोमाका लोरेन्जो पलिग्रेनी र हेनरिक मिख्टरयानको गोल सान्वता बन्यो ।

घरेलु मैदानमा २–० ले पछि परेको अवस्थामा रोमाले उत्कृष्ट पूनरागमन गर्दै खेललाई अतिरिक्त समयमा धकेलेपनि हार टार्न सकेन । खेलको छैटौं मिनेटमा नै एन्ड्रे गालाविनोभले पेनाल्टीम गोल गर्दै स्पेजियालाई अघि बढाएका थिए । १५औं मिनेटमा रिकार्डाे सापोनाराले गोल गर्दै स्पेजियाको अग्रता दोब्बर पारे ।

४३औं मिनेटमा लोरेन्जो पेलिग्रेनीले पेनाल्टीमार्फत गोल गर्दै खेललाई पहिलो हाफमा २–१ को अवस्थामा ल्याए । ७३औं मिनेटमा हेनरिक मिख्टरानले बोर्जा मायोरलको पासमा गोल गर्दै खेललाई २–२ गोलको बराबरीमा ल्याए ।

त्यसपछि खेल अतिरिक्त समयमा लम्बिदा रोमा दुई मिनेटको अन्तरमा ९ खेलाडीमा समेटिन पुग्यो ।९१औं मिनेटमा जियानलुका मान्सिनी दोहोरो पहेलो कार्ड खादै मैदानबाट बाहिरिदा ९२औं मिनेटमा पाउ लोपेज सिधै रातो कार्ड खादै मैदानबाट बाहिरिए ।

त्यसको फाइदा स्पेजियाले उठाउन सफल भयो । १०७औं मिनेटमा डनिले भर्डीले गोल गर्दै खेललाई ३–२ ले अघि बढाए । ११९औं मिनेटमा रिकार्डाे सापोनाराले व्यक्तिगत दोस्रो गोल गर्दै टोलीलाई ४–२ को जित दिलाए ।