एजेन्सी – दोस्रो श्रेणीको एसपालमाथि सानदार जित निकाल्दै युभेन्टस कोपा इटालियाको सेमिफाइनलमा प्रवेश गरेको छ ।

घरेलु मैदानमा बुधबार राति भएको खेलमा युभेन्टसले आफ्नो स्टार फरवार्ड क्रिस्टियानो रोनाल्डोविना एसपालमाथि ४–० को फराकिलो जित निकालेका हो । युभेन्टसको फराकिलो जितमा अल्भारो मोराटा, जियानलुका फ्राबोट्टा, डिजान कुलुसेभ्स्की र फेडरिको चियसाले गोल गरे । पहिलो र दोस्रो हाफमा समान २ गोल भएको थियो।

एलिएन्ज स्टेडियम टोरिनोमा घरेलु टोलीले खेलको १६औं मिनेटमा अल्भारो मोराटाको पेनाल्टी गोलबाट अग्रता लिएको थियो । एड्रिएन राबिओटमाथि भिकारीले फल गरेपछि रेफ्रीले भिएआरको सहायता लिदै युभेन्टसलाई पेनाल्टी प्रदान गरेको थियो । जसमा मोराटा चुकेनन् ।

३३औं मिनेटमा जियानलुलका फ्राबुट्टाले डिजान कुलुसेभ्स्कीको पासमा गोल गर्दै युभेन्टसको अग्रता दोब्बर पारे । ७८औं मिनेटमा कुलुसेभ्स्कीले फेडरिको चियसाको पासमा गोल गर्दै युभेन्टसलाई फराकिलो जिततर्फ अग्रसर गराए ।

९०औ मिनेटमा चियसाले कोसिमो मार्काे दा ग्राकाको पासमा गोल गर्दै युभेन्टसलाई ४–० को फराकिलो जित दिलाए । यस खेलमा प्रशिक्षक आन्द्र पिर्लाेले रोनाल्डोलाई विश्राम दिएका थिए ।

अब युभेन्टसले सेमिफाइनलमा इन्टरमिलानको सामना गर्नेछ । इन्टरले एसी मिलानलाई २–१ हराउदै अन्तिम चारमा स्थान पक्का गरेको थियो । सेमिफाइनल १० फेब्रुअरीमा हुनेछ ।