एजेन्सी – यूईएफए च्याम्पियन्स लिग अन्तर्गत राउण्ड अफ १६ को पहिलो लेगमा जर्मन च्याम्पियन बायर्नले लाजियोको मैदानमा सानदार जित दर्ता गरेको छ । रोबर्ट लेवान्डोस्कीको प्रभावशाली प्रदर्शनमा बायर्न ४-१ ले विजयी रहयो ।

खेलको नवौं मिनेटमा लेवान्डोस्कीले गोल गर्दै बायर्नलाई सुरुवाती अग्रता दिलाएका थिए । उनले डिफेन्समा तालमेल नमिलेको फाइदा उठाउँदै सहज गोल गरेका थिए । उनले आफ्नो च्याम्पियन्स लिग करिअरको ७२ औं गोल गर्दै सर्वाधिक गोल गर्ने खेलाडी सुचिमा रियल म्याड्रिडका लेजेण्ड राउललाई पनि उछिने । उनी समग्रमा क्रिस्टियानो रोनाल्डो र लिओनेल मेस्सीपछि तेस्रो स्थानमा छन् ।

खेलको २४ औं मिनेटमा लिओन गोरेट्जकाको पासलाई सदुपयोग गर्दै जमाल मुसियालाले बायर्नको अग्रता दोब्बर पारे । १७ वर्षीय इंग्लिस मिडफिल्डर उक्त गोलसँगै प्रतियोगितामा गोल गर्ने बायर्न तथा इंग्ल्याण्डका सबैभन्दा कान्छा खेलाडी समेत बने । मुसियालाले अन्तर्राष्ट्रिय स्तरमा दुवै जर्मनी र इंग्ल्यान्डबाट खेल्न योग्य छन् ।

लेरोय सानेले पहिलो हाफ सकिन ३ मिनेट बाँकी हुँदा अर्को गोल थपे । कोमानको प्रहारलाई गोलरक्षक रेइनाले बचाएपछि रिबाउन्डमा सानेले गोल गरे । दोस्रो हाफको ४७ औं मिनेटमा सानेकै प्रहार डिफेन्डर फ्रान्सेस्को अचेरबीलाई लाग्दै आत्मघाती गोल हुँदा बायर्न ४-० ले अघि बढ्यो । एन्जल कोर्रियाले ४९ औं मिनेटमा गोल फर्काएपनि नतिजा भने बदल्न सकेनन् ।

खेलको दोस्रो लेग अब १७ मार्चमा हुनेछ । लाजियो २१ वर्षपछि च्याम्पियन्स लिगको नकआउट चरणमा प्रवेश गरेपनि उक्त यात्रा अन्तिम १६ मा नै समाप्त हुने देखिन्छ ।