काठमाडौं (हाम्रो खेलकुद) – नेपाल सुपर लिग (एनएसएल) मा प्रतिस्पर्धा गर्ने ७ फ्रेन्चाइज टोली सार्वजनिक भएको छ । आयोजक नेपाल स्पोर्टस एन्ड इभेन्ट म्यानेजमेन्टले आइतबार एक कार्यक्रममाझ सहभागी फ्रेन्चाइजको नाम सार्वजनिक गरेको हो ।

सहभागी टोलीहरु विराटनगर सिटी फुटबल क्लब, काठमाडौं रेजर्स, ललितपुर सिटी फुटबल क्लब, एफसी चितवन, पोखरा‌ थन्डर्स, बुटवल लुम्बिनी एफसी र धनगढी फुटबल क्लब रहेका छन् ।

विराटनगर सिटी एफसीका अध्यक्ष अनुप रञ्जन भट्टराईले तराइमा फुटबलको क्रेजलाई मध्यनजर गर्दै यहाँको फुटबल संस्कृति विकासमा सहभागी हुन पाएकोमा खुसी व्यक्त गरे । काठमाडौंको स्वामित्व मोरङ अटो वर्क्सले खरिद गरेको हो ‌। भाटभटेनी सुपरमार्केटले ललितपुर टोली हेर्नेछ ।

चितवन टोलीमा व्यवसायी चन्द्र ढकालको लगानी रहेको छ । पोखराको मालिकमा लक्ष्मी हुन्डाईका निराकार श्रेष्ठ रहेका छन् । श्रेष्ठले ए डिभिजन टोलीसँग आवद्धतापछि लक्ष्मी ग्रुपको स्थापना स्थल पोखरा रोजेको जानकारी दिए । बुटवलको स्वामित्व राजकुमार तिमल्सिनाको कम्पनिले खरिद गरेको हो ।

धनगढीको टिमलाई सुबास शाहीले खरिद गरेका छन् । नेपाली क्रिकेटमा लामो समयदेखि लाग्दै आएका शाहिले खेलकुदलाई सशक्त उद्योगका रुपमा अघि बढाउन यो कदम चालिएको बताए ।

खेलाडी अक्सन चैत ६ गते हुने बुझिएको छ । २०७६ कै वैशाख र जेठमा आयोजना गर्ने गरि एन्फा र म्यानेजमेन्टबीच २०७५ को पुसमा सम्झौता भएको थियो । त्यति बेलाको सम्झौताले बल्ल यसपटक मुर्त रुप लिन लागेको हो । वैशाख ११ देखि २५ सम्म दशरथ रंगशालामा प्रतियोगिता गर्ने तयारी रहेको छ ।

एन्फाले नेपाली फुटबलको दिगो विकास र विस्तार गर्न विकेन्द्रीकरण नीति अनुसार उपत्यका बाहिर सातै प्रदेशमा फुटबल विकासका लागि लिग गर्न लागेको जनाएको छ । सुरुवाती सम्झौताका समयमा फ्रेन्चाइज लिग प्रादेशिक अवधारणा गरिइने बताइएको थियो । तर अहिले सहरको आधारमा टोली बन्ने भनिएको छ ।

फ्रेन्चाइज लिगका लागि एन्फाले हाल १४ ‘ए’ डिभिजन क्लबबाट उत्कृष्ट १ सय ४० खेलाडी छनोट गरेर सबै प्रदेशलाई बाँड्दै टिम बनाउने बताएको थियो । प्रतियोगिता सिंगल राउण्ड रोबिनको आधारमा खेलाइने जनाएको छ ।

हरेक टोलीमा विभिन्न श्रेणीका २० खेलाडी रहने र खेलाडीको श्रेणी एन्फाको सहकार्यमा छुट्टाइने म्यानेजमेन्टले जनाएको छ । हरेक टोली ३ जना राष्ट्रिय खेलाडी राख्न पाउने र मैदानमा २ खेलाडी सम्म उतार्न पाइने प्रावधान गरिने बताएको छ ।