काठमाडौं (हाम्रो खलकुद)– अर्को महिनाका लागि आयोजना तय भएको नेपाल सुपर लिग (एनएसएल) ले घरेलु फुटबलमा एउटा तरंग ल्याइदिएको छ । यद्दपी यसको सफलताका बारेमा अहिले नै आकंलन गर्न हतारो हुनेछ ।

पहिलो पटक घरेलु फुटबलमा फ्रेन्चाइज लिगको अवधारणा प्रयोग हुने क्रममा छ । २०७६ को वैशाख जेठमा एनएसएल गर्ने विषयमा नेपाल स्पोर्ट्स एभेन्ट म्यानेजमेन्ट र अखिल नेपाल फुटबल संघ (एन्फा) बीच दुई वर्ष अघि नै सम्झौता भएको थियो । तर दुई वर्ष कुनै गतिविधि हुन नसक्दा एनएसएल घोषणामै सिमित हुने शंका बढेको थियो ।

पछिल्लो एक सातालाई हेर्ने हो भने अब एनएसएल हुनेमा शंका भन्दा बढी विश्वास गर्ने ठाँउ देखिएको छ । तथापी अक्सनको अघिल्लो दिन मात्र खेलाडीको श्रेणीको सुची जारी हुनु, पटक पटक पहिला घोषणा गरिएका विभिन्न प्रावधान फेरिदै जाँदा एनएसएललाई आलोचनात्मक रुपमा हेर्नेलाई बल मिलेको छ ।

यद्दपी तमाम शंका उपशंकाबीच शुक्रबार ९८ खेलाडी अक्सनमा विक्री हुँदैछन् । एनएसएलमा सहभागी ७ टोलीले अक्सनबाट समान १४ खेलाडी खरिद गर्दैछन् । अक्सनका लागि एन्फाले १ सय ५८ खेलाडीको सुची एनएसएललाई उपलब्ध गराएको छ । एन्फाले उपलब्ध गराएको सुचिमा भने खेलाडी निर्धारण गर्दा निकै त्रुटी छन् । हालसम्म राष्ट्रिय टोलीमा नपरेका केहि खेलाडी ए श्रेणीमा रहँदा नियमित खेलाडी समेत बी श्रेणीमा रहेका छन् ।

मिडफिल्डर विक्रम लामा चोटका कारण कतारमा उपचाररत रहँदा उनको नाम बी श्रेणीमा छ । यस्तै थ्री स्टारका अर्का घाइते खेलाडी सुशील राई अक्सन लिस्टमा रहँदा ए डिभिजन लिगमा उत्कृष्ट प्रदर्शन गरेका सुशन श्रेष्ठको भने नाम छैन । अक्सन लिस्टमा थुप्रै ए डिभिजनका नियमित खेलाडीको नाम रहेको छैन ।

अक्सनको अघिल्लो दिन सम्म औपचारिक रुपमा श्रेणीका खेलाडीका लागि न्यूनत्तम र अधिकत्मक मुल्यका बारेमा जानकारी दिइएको छैन । आयोजकले अक्सनकै दौरान सबै विषय प्रष्ट हुने बताएको छ । एन्फाले राष्ट्रिय टोलीको बन्द प्रशिक्षणमा रहेका ३५ खेलाडीलाई ए, ६५ खेलाडीलाई बी र ५८ खेलाडीलाई सी श्रेणीमा वर्गिकरण गरेको छ ।

शुक्रबार १४ खेलाडीका लागि कम्तीमा १० लाख देखि बढीमा १५ लाख ५० हजार रुपैयाँ सम्म खर्च गर्न सक्नेछन् । ए श्रेणीका एक जना खेलाडीको न्यूनत्तम मुल्य ८० हजार र अधिकत्तम २ लाख रुपैयाँ सम्म निर्धारण गरिएको श्रोतले बतायो । त्यस्तै बी श्रेणीका एक खेलाडीका लागि ५० हजारबाट बोली सुरु हुनेछ भने बढीमा १ लाख २५ हजार रुपैयाँ सम्म खर्च गर्न सकिनेछ । सी श्रेणीका खेलाडीका लागि न्यूनत्तम २५ हजारदेखि ७५ हजार रुपैयाँ सम्मको मुल्य निर्धारण गरिएको छ ।

एक भन्दा बढी क्लबले एउटा खेलाडीका लागि अधिकत्तम बोली लगाएको खण्डमा गोलाप्रथाका आधारमा टोलीले खेलाडी प्राप्त गर्नेछन् । अक्सनमार्फत एउटा टोलीले ए श्रेणीका ३ तथा बी र सीबाट ११ जना खेलाडी खरिद गर्न सक्नेछन् ।

एन्फाले खेलाडीको सहमति विनै सुची आयोजकलाई पठाएको छ । यदि कसैले सुचीमा रहन नचाहेको खण्डमा इमेलमार्फत जानकारी गराउन एन्फाले प्रेस विज्ञप्ती जारी गरेको छ । शुक्रबार ९८ खेलाडीको विक्री हुनेछन् । ६० खेलाडी विक्री हुने छैनन् । विक्री नहुने खेलाडी पछि आवश्यकताका आधारमा टोलीले लिन पाउने प्रावधान रहने बताइएको छ ।

हरेक फ्रेन्चाइज टोलीले २० खेलाडी राख्न पाउनेछन् । जसमा मार्की, ३ विदेशी र २ हिडन खेलाडीका रुपमा टोलीमा राख्न पाउने प्रावधान छ । मार्की खेलाडीको न्युनत्तम मुल्य भने २ लाख ५० हजार रुपैयाँ तोकिएको बुझिएको छ । अहिले सम्म मार्की खेलाडीका रुपमा ललितपुर सिटी फुटबल क्लबले अन्जन विष्टलाई ५ लाख ५० हजार रुपैयाँमा अनुबन्ध गरेको छ । सार्वजनिक भएका अन्य मार्कीको मुल्य भने गोप्य राखिएको छ ।

अहिले सम्म औपचारिक रुपमा विराटनगर सिटी एफसी, काठमाडौं रेजर्स, एफसी चितवन, ललितपुर र धनगढी एफसीले मार्की खेलाडी औपचारिक रुपमा सार्वजनिक गरिसकेका छन् । बुटबल र पोखरा थन्जर्सले भने मार्की खेलाडीको औपचारिक घोषणा गर्न बाँकी छ । धनगढी, चितवन र काठमाडौ रेजसले प्रशिक्षक नियुक्त गरिसकेको छ । धनगढीले टोपे फुजा, चितवनले मेघराज केसी र काठमाडौं रेजर्सले बालगोपाल महर्जनलाई प्रशिक्षक नियुक्त गरेको हो ।

पोखरा थन्डर्स र बुटवल लुम्बिनी युनाइटेडले हालसम्म औपचारिक रुपमा आफ्नो टोली सार्वजनिक गरेका छैनन् । तर स्रोतका अनुसार बुटवलले राजुकाजी शाक्यको प्रशिक्षणमा विशाल श्रेष्ठलाई मार्की खेलाडीका रुपमा अनुबन्ध गरेको छ । त्यस्तै पोखराले आर्मीका नवयुग श्रेष्ठलाई मार्की तथा उनकै टोलीका प्रशिक्षक नवीन न्यौपानेलाई प्रशिक्षकमा भित्र्याएको छ । एनएसएल वैशाख ११ देखि २५ गतेसम्म दशरथ रंगशालामा हुनेछ ।