काठमाडौं (हाम्रो खेलकुद) – दशरथ रंगशालामा अर्को महिना आयोजना हुने नेपाल सुपर लिग (एनएसएल) का ३ टोलीले प्रशिक्षक नियुक्त गरेको छ । वैशाख ११ गते देखि २५ गते सम्म आयोजना हुने एनएसएलमा सहभागी ७ मध्ये ६ टोलीले प्रशिक्षक नियुक्त गरेका छन् ।

पूर्व राष्ट्रिय खेलाडी नवीन न्यौपाने, थ्री स्टार क्लबलाई लिग जिदाएका प्रदीप हुमागाई र सनोज श्रेष्ले एनएसएलका टोलीलाई प्रशिक्षण दिने भएका छन् । एनएसएलका लागि न्यौपाने र हुमागाईले आ आफ्नो टोलीको प्रतिनिधित्व गरेका थिए । श्रेष्ठ भने अक्सनमा थिएनन् । राष्ट्रिय टोलीका पूर्व कप्तान समेत रहेका प्रशिक्षक राजुकाजी शाक्य भने बुटबल लुम्बिनी एफसीकातर्फबाट अक्सनमा सहभागी थिए । न्यौपानेलाई पोखरा थन्डर्स, हुमागाईलाई ललिपतुर सिटी एफसी र श्रेष्ठले बुटबल लुम्बिनी एफसी,प्रशिक्षकका रुपमा सर्वाजनिक गरेको हो ।

यसअघि ३ टोलीले औपचारिक रुपमा प्रशिक्षक नियुक्तको घोषणा गरेको थियो । एफसी चितवनले मेघराज केसी, धनगढी एफसीले विदेशी टोपे फुजा र काठमाडौं रेजर्सले बालगोपाल महर्जनलाई प्रशिक्षक नियुक्त गरेको थियो । विराटनगर सिटी एफसीले भने अहिले सम्म प्रशिक्षक नियुक्त गरेको छैन ।

खेलाडीका रुपमा मनाङ मस्र्याङ्दी क्लबबाट ४ पटक ए डिभिजन लिग जितेका न्यौपाने युवा प्रशिक्षकमा आश लाग्दा मानिएका छन् । केहि वर्षयता उनी त्रिभुवन आर्मी फुटबल क्लबको प्रशिक्षकका रुपमा कार्यरत छन् । उनको प्रशिक्षणमा आर्मीले गत वर्ष लिगमा दोस्रो स्थान हासिल गरेको थियो ।
हुमागाई भने ८ वर्षपछि घरेलु फुटबलमा फर्केका छन् । २०६९ मा थ्री स्टार क्लबलाई सहिद स्मारक ए डिभिजन लिगसहित केहि नकआउट फुटबलको उपाधि दिलाएका हुमागाई त्यसपछि अमेरिका लागेका थिए । केहि महिना अघि स्वदेश फर्केका हुमागाई ए लाइन्स प्रशिक्षक हुन् ।
श्रेष्ठको प्रशिक्षक हालैमात्र सातदोबाटो क्लब बीबाट ए डिभिजनमा बढुवा भएको थियो । उनले यसअघि ए डिभिजन टोली ब्रिगेड ब्वाइज क्लबलाई प्रशिक्षण दिएका थिए ।

यसअघि बुटबल लुम्बिनी एफसीको प्रशिक्षकमा सनोज श्रेष्ठ हुनुपर्नेमा अन्यथा भएकोले सच्चाईएको छ ।