काठमाडौं (हाम्रो खेलकुद)– फ्रेन्चाईज लिग नेपाल सुपर लिग (एनएसएल) टोली विराटनगर सिटी (बिसिएफसी) फुटबलले विराटनगरमै प्रशिक्षण गर्ने भएको छ । एनएसएलको तयारका लागि १० दिन विराटनगरमा प्रशिक्षण गरिने बिसिएफसीले जनाएको छ ।

त्यसअघि क्लबको औपचारिक उद्घाटन प्रदेश १ का मुख्य मन्त्री शेरधन राईले बिहीबार गर्ने तय भएको जनाएको छ । विराटनगरको हाटखोलाको फन एन्ड फुड भिलेजमा एक कार्यक्रममार्फत क्लबको औपचारिक सुरुवातको घोषणा गरिने कार्यक्रम तय भएको जनाइएको छ ।सो कार्यक्रममा विराटनगर महानगरपालिकाका मेयर भिम पराजुली पनि उपस्थित हुने बताइएको छ ।

बिसिएफसीको स्थापनासँगै औद्योगिक सहर विराटनगरको गरिमा पनि बढ्ने क्लबले विश्वास लिएको छ । क्लबले गत साता राष्ट्रिय टोली र सहिद स्मारक ए डिभिजन लिग च्याम्पियन मछिन्द्र क्लबका रञ्जित धिमाललाई आफ्नो मार्की खेलाडीका रुपमा अनुबन्ध गरेको थियो । बिसिएफसीले युवा खेलाडी लागि प्लेटफार्म सिर्जना गरि विराटनगरसँगै देशकै फुटबल स्तर बढाउने लक्ष्य राखेको जनाएको छ । क्लबले प्रि सिजनमा विराटनगरका युवा स्थानीय खेलाडीलाई पनि सामेल गर्ने बताएको छ ।

चैत ६ गते अक्सनबाट बिसिएफसीले १४ खेलाडी पाएको थियो । टोलीले अक्सनबाट सरोज दाहाल, सुनिल बल, सन्तोष तामाङ, अशोक थापा, किशोर गिरी, विजय धिमाल, हेम तामाङ, दीपक राई, निरकुमार राई, , विक्रम धिमाल, सुरज जिउ ठकुरी, सूर्य अधिकारी, सुशील लामा र सुनिल खड्का लिएको थियो ।

नेपाल स्पोर्ट्स एण्ड इभेन्ट्स म्यानेजमेन्टको आयोजनामा वैशाख ११ देखि २५ गते सम्म हुने सुपर लिगमा ७ टोलीको सहभागिता रहनेछ । नेपालमा पहिलो पटक फ्रेन्चाईज लिग पहिलो पटक आयोजना हुन लागेको हो ।