सुरुङ्गा (हाम्रो खेलकुद) – पाहुना टोली हाम्रो इटहरी भेट्रान्स क्लबलाई ३–० ले हराउँदै आयोजक कनकाई भेट्रान्स क्लबले झापाको सुरुङ्गामा सम्पन्न कनकाई भेट्रान्स कप फुटबल प्रतियोगिताको उपाधि जितेको छ । विजयी टोलीले उपाहिसहित १ लाख १ हजार रुपैयाँ र हाम्रो इटहरीले ६१ हजार रुपैयाँमा प्राप्त गर्यो ।

कनकाई माविको खेल मैदानमा शनिबार भएको फाइनलमा कनकाईले हाम्रो इटहरीलाई सुरुवातदेखि नै दबाबमा राखेको थियो । हाम्रो इटहरीले केही मुभ बनाए पनि गोल गर्न भने सकेन । खेलको १३ औँ मिनटमा कनकाईका रमेश गुरुङले गोल गर्दै अग्रता दिलाएका थिए । हाम्रो इटहरीको फितलो रक्षापंक्तिको फाइदा उठाउँदै सन्तोष बस्नेतले उपलब्ध गराएको क्रसलाई रमेशले गोलको दिशा दिएका थिए ।

त्यस्तै, रमेशको पासमा सन्तोषले टोलीका लागि २४ औँ मिनेटमा दोस्रो गोल गरेका थिए । ४४ औँ मिनेटमा सन्तोषले व्यक्तिगत दोस्रो तथा टोलीका लागि तेस्रो गोल गरे । गोलपोस्टको दायाँ बार च्यापेर सन्तोषले गरेको प्रहार गोलरक्षको हातबाट फुस्किएर गोलमा परिणत भएको थियो ।
१६ र २० औँ मिनेटमा नरेन्द्रमणि लिम्बूको दुईवटा हेडर हाम्रो इटहरीका गोलरक्षक देव कान्तले बचाएका थिए । फाइनलको म्यान अफ द म्याच आयोजक कनकाईका सन्तोष बस्नेत भए । उनलाई ढुवानी व्यवसायी महासंघका केन्द्रीय सदस्य तथा युवा व्यवसायी श्याम प्रसाईंले २ हजार रुपैयाँ प्रदान गरे ।

प्रतियोगिताभरिको उत्कृष्ट गोलरक्षक कनकाईका सञ्जय ठाकुर भए । उनले २ हजार रुपैयाँ पाए । उत्कृष्ट खेलाडी रमेश गुरुङ घोषित भए र उनले ५ हजार रुपैयाँ पाए । विजेता तथा उपविजेता टोलीलाई कनकाई नगरपालिकाका प्रमुख राजेन्द्र पोखरेल, उपप्रमुख मञ्जु प्रसाईंलगायतले पुरस्कार वितरण गरेका थिए । कनकाई भेट्रान्स क्लबको आयोजनामा भएको प्रतियोगितामा ८ वटा टिम सहभागी थिए ।