काठमाडौं (हाम्रो खेलकुद) – आर्मीका फरवार्ड नवयुग श्रेष्ठको गोलमा पोखरा थन्डर्सले पहिलो संस्करणको खुकुरी नेपाल सुपर लिग (एनएसएल) फुटबलमा विराटनगर सिटी एफसीलाई १–० ले पराजित गरेको छ ।

त्रिपुरेश्वरस्थित दशरथ रंगशालामा बुधबार भएको खेलमा नवयुगले खेल सकिन ७ मिनेट बाँकी रहँदा गरेको गोल नै पोखराको जितमा निर्णायक बन्यो । नवयुगले ८३औं मिनेटमा मौसा अब्बाको फ्रिकिकलाई हेडमार्फत गोल गरेका हुन् ।

खेलको ११औं मिनेटमा मौसा अब्बाले वान भर्सेस वानको अवस्थामा गरेको प्रहार आकासिदा पोखरा थन्डर्स अग्रता लिनबाट चुक्यो । अघिल्लो खेलमा धनगढीलाई ३–० ले हराएको विराटनगरले पोखराविरुद्ध गतिलो आक्रमण बुन्न सकेको छैन । ४४औं मिनेटमा पेड्रो मान्जीले गोलरक्षक दिप कार्कीलाई बिट गर्दै गरेको प्रहार पोस्ट नजिकैबाट बाहिरिदा विराटनगर अग्रता लिनबाट चुक्यो ।

५४औं मिनेटमा हेम तामाङको ब्याक पासलाई नवयुग श्रेष्ठले भेट्दै गरेको प्रहार गोलरक्षक किशोर गिरीले पञ्च गर्दै बचाए । ६१औं मिनेटमा रवि पासवानले पेनाल्टी बक्सबाहिरबाट गरेको सशक्त प्रहार क्रसबारमा लागेर बाहिरिदा पोखराले अग्रता लिन सकेन । ८३औं मिनेटमा नवयुगले गोल गर्दै पोखरालाई १–० को अग्रता दिलाएका हुन् । मौसा अब्बाको फ्रिकिकमा नवयुगले अघि बढ्दै हेडमार्फत गोल गरेका हुन् ।

जितपछि पोखराले २ खेलबाट ३ अंक जोडेको छ । पराजित विराटनगरको दुई खेलबाट ३ अंक छ । पोखराका नितिथ थापा इमर्जिङ प्लेयर अफ दि म्याच चुनिए । उनले १० हजार रुपैया हात पारे । पोखराकै नवयुग श्रेष्ठ प्लेयर अफ दि म्याच चुनिए । उनले २५ हजार रुपैयाँ प्राप्त गरे ।

एनएसएलमा बिहीबार ललितपुर सिटी एफसी र धनगढी सिटी एफसीबीच प्रतिस्पर्धा हुदैछ । नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ ।

राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधातर्फका उत्कृष्टले जनही १ लाख तथा उत्कृष्ट युवा खेलाडीले पनि १ लाख रुपैया हात पार्नेछन् । हरेक खेलको म्यान अफ दि म्याचले २५ हजार रुपैयाँ पाउने छन् ।