काठमाडौं (हाम्रो खेलकुद) – नुर्लान नोब्रुजोभ जाहिद पेनाल्टीमा चुक्दा ललितपुर सिटी एफसीले र धनगढी एफसीसँग खुकुरी नेपाल सुपर लिग (एनएसएल) को पहिलो हाफमा गोलरहित बराबरी खेलेको छ ।

त्रिपुरेश्वरस्थित दशरथ रंगशालामा बल पोसेसनमा पकड बनाउँदै आक्रमण बुनेपनि ललितपुर सिटी एफसीले फिनिसिङ गर्न सकिरहेका छैनन् ।
खेलको पाँचौ मिनेटमा मार्की खेलाडी तथा कप्तान अन्जन विष्टले गोल गरेपनि उनको गोलले मान्यता पाएन ।

नविन लामाको पासमा विमल रानाको प्रहारलाई धनगढीका कप्तान तथा आइकोनिक खेलाडी किरण चेम्जोङले नियन्त्रणमा लिन नसक्दा रिवाउन्डमा आएको बललाई अन्जनले जाली चुमाएपनि उनी त्यसअघि नै अफसाइड पोजिसनमा रहेका थिए । २२औं मिनेटमा भिलिम पोसिलिन्कोभिकको प्रहारलाई गोलरक्षक किरणले सहजै नियन्त्रणमा लियो ।

२७औं मिनेटमा नविन लामाको फ्रिकिकलाई पाल्साङ लामाले ब्याकहिलमार्फत दिएको पासलाई एरिक विष्टले पेनाल्टी बक्सबाहिरबाट गरेको प्रहार दोस्रो बार च्याप्दै बाहिरिदा ललितपुर अग्रता लिनबाट चुकेको थियो ।

४२औं मिनेटमा अन्जन विष्टको प्रहारलाई दिनेश राजवंशीले गोललाइनबाट क्लियर गर्दा ललितपुर अग्रता लिनबाट चुक्यो । ४३औं मिनेटमा कप्तान किरण चेम्जोङले अन्जन विष्टलाई एल्वो प्रहार गरेपछि रेफ्रीले ललितपुरलाई पेनाल्टी प्रदान गरेको थियो । तर, ४४औं मिनेटमा नुर्लान नोब्रुजोभ जाहिदको पेनाल्टीलाई किरणले सहजै बचाउदै धनगढीको खतरा टारे । दोस्रो हाफ केहीबेरमा शुरु हुनेछ ।