काठमाडौं (हाम्रो खेलकुद)– फुटबलमा सामान्यता एउटा खेलपछि खेलाडीलाई अर्को खेलअघि ४८ घण्टा आराम दिनुपर्ने हुन्छ । यद्दपी त्यो पर्याप्त भने होइन । अन्तर्राष्ट्रिय पद्दति अनुसार ७२ घण्टाको आरामलाई उपयुक्त मानिन्छ । अहिले दशरथ रंगशालामा जारी देशकै पहिलो फेन्चाईज लिग खुकरी सुपर लिग (एनएसएल) का खेलाडीले भने पर्याप्त आराम पाइरहेका छैनन् ।

वैशाख ११ गते सुरु भएको एनएसलको सुरुको ६ दिनमा ८ खेल भइसकेका छन् । सहभागी ७ टोलीले हरेक तेस्रो दिन जस्तोमा खेल्नु परेको छ । धनगढी एफसी र ललितपुर सिटी एफसीले ३ खेल खेलिसकेका छन् । बिहीबार १–१ को बराबरीपछि पोष्ट म्याच कन्फ्रेन्समा धनगढीका प्रशिक्षक युगलकिशोर राईले आफ्नो भनाईको सुरुवात नै खेलाडीलाई पर्याप्त आराम नभएको बाट सुरु गरेका थिए ।

‘यो समस्या हामीलाई मात्र होइन, सबै टोलीका लागि हो । एकदमै कम ग्याप भयो । जसले गर्दा खेलाडीले रिकभरीको समय पाउँदैनन्’, उनले भने, ‘हाम्रा केहि खेलाडी घाइते भएका छन् । अरु क्लबको पनि त्यहि समस्या छ ।’

कोरोनाको दोस्रो लहरका कारण निषेधाज्ञा सुरु हुनुअघि नै सार्वजनिक गरिएको एनएसएलको खेल तालिका हेर्दा हतारमा सक्नु पर्ने बाध्यता जस्तो देखिन्थ्यो । एनएसएलमा २२ दिनमा २५ खेल सक्ने एनएसएलको तालिका छ । लिगमा हरेक टोलीले कम्तीमा ६ खेल खेल्नेछन् । शीर्ष ४ टोलीले भने ७ देखि ९ खेल खेल्नुपर्ने हुन्छ । यो अवस्था हेर्दा पनि खेलाडी माथि शारीरिक रुपमा दबाब देखिन्छ ।

यसैपनि घरेलु फुटबलमा खेलाडीलाई पर्याप्त आराम दिने सवालमा ध्यान दिएको देखिन्न । मोसफलमा आयोजना हुने नकआउटका खेलतालिका हर्दा खेलाडीको क्षमता जाच्नकै लागि प्रतियोगिताको आयोजना गरिए जस्तो अभास हुन्थ्यो । एउटा प्रतियोगिता सक्ने नपाउँदै अर्को प्रतियोगिता सुरु भइसक्ने ।

एउटै क्लबका दुई टोली बनाएर अलग अलग प्रतियोगिताामा भाग लिने घरेलु फुटबलको अवस्था थियो । राता रात बसको यात्रा गरेर अर्को दिन अर्को प्रतियोगिता खेल्ने नेपाली क्लबको परम्परा जस्तो बनेको छ । यस्तोमा आयोजक र सहभागी टोलीले खेलाडीमाथि दबाब पारिरहेको विषयमा कमै चर्चा हुने गर्दछ । पर्याप्त आराम र चोटमुक्त नहुँदा खेलाडीले स्वभाविक खेल पस्कन सक्दैनन् । हरेक तेस्रो दिनमा खेल्नु पर्ने भएकैले पनि हुन सक्छ एनएसएलका अधिकांश खेलाडी थकित देखिन्छन् ।

राष्ट्रिय टोलीमा हुने खेलाडी लगातार प्रशिक्षण र थ्री नेसन्स कपमा व्यस्त थिए । त्यसबाहेकका खेलाडी भने मोसफलका प्रतियोगिताहरुमा लगातार खेलिरहेका थिए । थ्री नेसन्स पछि कतिपय राष्ट्रिय खेलाडी मोसफलका प्रतियोगिता खेल्न पुगे । देख्दा सामान्य लाग्ने तर खेलाडीको आरामका विषयमा सम्बन्धित पक्षले कमै ध्यान दिएको देखिन्न ।

चोटका कारण कतिपय खेलाडीले एनएसएलबाट बिदा नै लिइसकेको अवस्था पनि छ । चितवनका डिफेन्डर विकास तामाङ प्रशिक्षणकै क्रममा घाइते हुँदै बाहिर रहे भने अर्का डिफेन्डर विकास खवास पनि पहिलो खेलमा नै चोट बोक्न पुगे । कप्तान भरत खवासले पनि ह्यामस्ट्रीङ समस्याले पछिल्लो खेल गुमाए ।

धनगढीले मिडफिल्डर योगेश गुरुङलाई दोस्रो खेलमा नै चोटका कारण गुमायो । डिफेन्डर अर्नेस्ट ताम्पी पनि चोटका कारण उपलब्ध नहुने भएका छन् । दोस्रो चरणको खेल नसकिंदै चोटका कारण यसरी खेलाडी गुमाउनु पक्कै सुखद खबर होइन ।

धनगढीले तेस्रो खेलको समाप्तीमा ४ अंक जोडेको छ । ललितपुर भने लिग चरणको मध्यान्तर सम्म आइपुग्दा पहिलो जितकै खोजीमा छ । तथापी टोलीमाथि त्यस्तो दबाब नरहेको र शीर्ष ४ पुग्नेमा आशावादी रहेको प्रशिक्षक प्रदीप हुमागाईले बताएका छन् । राम्रो खेल्दा खेल्दै पनि जित्न नसक्नुलाई भने उनले दुर्भाग्यको संज्ञा दिए । ललितपुरले ३ खेलमा १ जित र २ खेलमा बराबरी खेल्दै २ अंक बटुलेको छ । यसैबीच, एनएसएलमा काठमाडौं रेजर्स र पोखरा थन्डर्सबीच शुक्रबार ५:३० बजे खेल हुनेछ ।