काठमाडौं (हाम्रो खेलकुद)– त्रिभुवन आर्मी फुटबल क्लबका रक्षक विकास तामाङ कम्तीमा ५ महिना मैदान बाहिर रहने भएका छन् । दायाँ खुट्टाको गोलीगाँठामा चोट लागेपछि मंगलबार बिएण्डी अस्पतालमा शल्यक्रिया गराएका विकास अहिले भक्तपुर सरस्वतीखेलस्थित घरमा आराम गरिरहेका छन् ।

डा. अमित जोशीको टोलीले उनको खुट्टाको शल्यक्रिया गरेको थियो । चोटकै कारण उनले खुकुरी नेपाल सुपर लिग (एनएसएल) टोली चितवन एफसीबाट नाम फिर्ता लिएका थिए । ‘गोलीगाँठाको एनरटेरिएर टेलोफिबुलार लिगानेन्ट (एटिएसएल) टियर भएको रहेछ । मंगलबार शल्यक्रिया भयो । हिजो बेलुका घर आए,’ शुक्रबार विकासले हाम्रो खेलकुदसँग भने ।

‘६ हप्ता पूरै बेड रेस्ट गर्नुपर्छ भन्नुभएको छ । त्यसपछि रिहाब अनि अभ्यास गर्न लागेपछि ५ महिनापछि फर्कन सक्छु भन्नुभएको छ।’

आफूले नै चोटलाई अलिक सामान्य रुपमा लिएकाले बढी क्षती भएको विकासले बताए । उनले थपे, ‘मेरो चोट चौथो स्टेजमा पुगिसकेको रहेछ । अलिक अघि नै उपचारमा गएको भए छिट्टो निको हुन सक्थ्यो । गोलीगाँठाको चोट सामान्य नै हुन्छ भनेर हल्का लिनु आफ्नै गल्ति भयो ।’

राष्ट्रिय टोलीको प्रशिक्षणमा रहेका उनी थ्री नेसन्स कपमा छनोट नभएपछि क्लबबाट लगातार खेलिरहेका छन् । थ्री नेसन्स कै सहभागी टोली कीर्गिस्तानको ओलम्पिक टोलीसँग दशरथ रंगशालामा मैत्रीपूर्ण खेल खेल्दा उनलाई चोट लागेको थियो । त्यो खेलमा उनको गोलीगाँठा मर्केको थियो । चैत २५ गते रंगशालामै एएफसी कपको छनोटअन्तर्गत श्रीलंका पुलिस क्लब विरुद्ध पनि उनले खेले । त्यसमा पनि उनको चोट थपियो ।

त्यसबीचमा एमआरआई पनि गरे । श्रीलंका पुलिससँगको खेलपछि आर्मी टोलीसँग उनी बैंगलरु एफसी खेल्न भारताको गोवा पुगे । त्यसमा पहिलो हाफपछि भने उनी खेल्नै नसक्ने भए । त्यसबीचमा हेटौंडामा पनि क्लबबाट खेले । फर्केर चितवन एफसीमा आबद्ध भए । त्यहि बीचमा चोट ठीक नभएपछि डक्टरकोमा पुगेका उनले एटिएसएल टियर भइसकेको थाहा पाए । अनि चितवनबाट नाम फिर्ता लिएर उपचारमा लागे ।

सुरुका केहि महिना आर्मीमा सम्झौतामा खेलेका विकास २०७० मा भर्ती भएका थिए । त्यसयता उनी टोलीको नियमित सदस्य रहँदै आएका छन् । एनएसएल सुरु हुनु अघि नै उनको ठाँउमा चितवनले आर्मीकै जितेन्द्र कार्कीलाई लिएको थियो । चितवनको पहिलो खेलमा चोट लागेपछि अर्का रक्षक विकास खवासपछि उपचारका क्रममा छन् । विकास खवासको सट्टा चितवनले आर्मीकै जर्ज प्रिन्स कार्कीलाई राखिसकेको छ ।