काठमाडौं (हाम्रो खेलकुद)– खुकुरी नेपाल सुपर लिग (एनएसएल) टोली ललितपुर सिटी एफसीले आफ्ना मुख्य प्रशिक्षक प्रदीप हुमागाईलाई आइतबार खेल सकेलगत्तै बर्खास्त गरेको छ ।

एनएसएलको आफ्नो ४ खेल खेल्दा पहिलो जित पनि दर्ता गर्न नसकेपछि ललितपुरले उनलाई बर्खास्त गरेको क्लब श्रोतले जनायो । दशरथ रंगशालामा आइतबार मात्र ललितपुरले पोखरा थन्डर्ससँग गोलरहित बराबरी खेलेको थियो । टोलीको त्यो तेस्रो बराबरी हो । अर्को एक खेलमा भने टोली पराजित भएको थियो ।

हुमागाईका सहायक रहेका पूर्व राष्ट्रिय खेलाडी राजु तामाङले बाँकी खेलमा टोलीको प्रशिक्षणमा सम्हाल्ने सम्भावना छ । हुमागाईले भने सामाजिक सञ्जालमार्फत आजैबाट लागू हुने गरि क्लबलाई बुझाएको राजीनामा पत्र सार्वजनिक गरेका छन् ।

ललितपुर ४ खेलमा ३ अंक जोडेर छैटौं स्थानमा रहेको छ । पहिलो खेलमा ललितपुर काठमाडौंसँग १–० ले पराजित भएको थियो । दोस्रो खेलमा चितवनसँग १–१ को बराबरी खेलेको ललितपुरले तेस्रो खेलमा धनगढीसँग १–१ कै बराबरी खेलेको थियो । पहिलो जित निकाल्न नसकेको ललितपुरले लिग चरणमा दुई खेल खेल्न बाँकी छ ।

रुस्लान थ्री स्टार क्लबलाई ए डिभिजिन लिग च्याम्पियन बनाइसकेका हुमागाई लामो समयदेखि अमेरिका बस्दै आएका छन् । ललितपुरको स्वामित्व भाट भटिनी सुपरमार्केटमा छ ।