काठमाडौं (हाम्रो खेलकुद) – खुकुरी नेपाल सुपर लिग (एनएसएल) मा आज मंगलबार बुटवल लुम्विनी र काठमाडौं रेजर्सबीच प्रतिस्पर्धा हुँदैछ । खेल त्रिपुरेश्वरस्थित दशरथ रंगशालामा साँझ ५:३० बजेपछि हुनेछ ।

काठमाडौं रेजर्सलाई पराजित गर्दै बुटवल लुम्विनी शीर्षस्थानमा उक्लने लक्ष्यमा रहँदा काठमाडौं पनि बुटवल लुम्विनीलाई हराउँदै शीर्ष चारमा उक्लने योजनामा हुनेछ । बुटवल लुम्बिनी ३ खेलबाट ५ अंक जोडेर तेस्रो स्थानमा रहेको छ । काठमाडौंलाई हराउन सके बुटवल लुम्विनीले विराटनगर सिटी एफसी र धनगढी एफसीलाई पछि पार्दै शीर्षस्थानमा उक्लनेछ ।

विशाल श्रेष्ठको कप्तानीमा रहेको बुटवल लुम्विनीसँग विराज महर्जन, लक्ष्मण रुचाल, रविन श्रेष्ठ, सेसेहाङ आङदेम्बे, मान बहादुर परियार, अमिर श्रेष्ठ, आशिष लामा, सुमन लामा, जय गुरुङ र रन्दिप पौडेल टोलीमा छन् । विदेशी खेलाडीमा अर्मान्ड, ओमोलाजा नुरेन करिम र विलियम ओपोकु रहेका छन् ।

काठमाडौंलाई शीर्ष चारमा पर्न बुटवल लुम्विनीविरुद्ध जितको खाँचो छ । त्यसैले पनि टोली जितको लक्ष्यसहित मैदान उत्रनेछ । काठमाडौं ३ खेलबाट ४ अंक जोडेर पाँचौ स्थानमा रहेको छ । बुटवल लुम्विनीलाई हराउन सके काठमाडौले विराटनगर सिटी र धनगढीसँग अंक बराबरी गर्नेछ ।

टोलीसँग मार्की खेलाडी तथा कप्तानको रुपमा गोलरक्षक विकेश कुथु रहँदा विदेशी खेलाडीमा मेसौके ओलुमोउ, स्टेफेन समिर र फ्लोरेन्ट कोर्वा रहेका छन् । यस्तै तेज तामाङ, सन्जोक राई, त्रिदेव गुरुङ, सुदिप शिख्रकार, राजन गुरुङ, विश्वास श्रेष्ठ, बिमल पाण्डेय, आशिष गुरुङ, विनय श्रेष्ठ, रुमेश बर्तौला, अन्जन राई, पृथ्बी चौधरी, सुदिल राई र प्रेजेन तामाङ टोलीमा छन् ।

चौथो चरणको खेल जारी रहँदा विराटनगर ४ खेलबाट ७ अंक जोडेर शीषस्थानमा छ । समान ७ अंक रहेपनि हेड टु हेडमा धनगढी दोस्रो स्थानमा छ । बुटवल लुम्विनी ३ खेलबाट ५ अंक जोडेर तेस्रो स्थानमा तथा चार खेलबाट ५ अंक जोडेको पोखरा थन्डर्स चौथो स्थानमा रहेको छ । ४ अंक जोडेको काठमाडौं रेजर्स पाँचौ स्थानमा छ । ३ अंक जोडेको ललितपुर छैटौं स्थानमा तथा चार खेलबाट २ अंक जोडेको चितवन पुछारमा रहेको छ । ललितपुर र चितवनको शीर्ष चारमा पर्ने सम्भावना कमजोर हुँदै गएको छ ।

लिगमा शीर्ष दुई स्थान हासिल गर्ने टोलीले फाइनल प्रवेशका लागि २८ बैशाखमा खेल्नेछन् । यस खेलमा पराजित हुने टोलीले २९ बैशाखमा तेस्रो र चौथो हुने टोलीबीचको विजेतासँग पुनः फाइनल प्रवेशका लागि ३० बैशाखमा खेल्नेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैयाँ हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।