एजेन्सी – यूईएफए च्याम्पियन्स लिग अन्तर्गत सेमिफाइनलको दोस्रो लेगमा रियल म्याड्रिडका कप्तान सर्जियो रामोस पहिलो रोजाइमा परेका छन् ।

चोटका कारण केहि समय मैदानबाहिर रहेका रामोसले दोस्रो लेगमा भने पुनरागमन गर्ने भएका हुन् । उनले चोटग्रस्त राफेल भारनको स्थान लिनेछन् । उनीसँगै सेन्टर डिफेन्समा इडर मिलिसाओले खेल्नेछन् । डिफेन्समा ड्यानी कार्भाजल घाइते हुँदा नाचो फर्नान्डेजले राइट ब्याकमा खेल्नेछन् । त्यस्तै फर्लान्ड मेन्डी लेफ्ट ब्याकको जिम्मेवारीमा छन् ।

गोलरक्षकमा थिबाउट कोर्टुवा नै नियमित छन् । रियल म्याड्रिडको मिडफिल्डमा टोनी क्रुस, क्यासेमिरो र लुका मोड्रीच तीनैजना रहेका छन् । यी तीनले पछिल्लो समय नियमित रुपमा उत्कृष्ट प्रदर्शन गरिरहेका छन् । आक्रमणमा मुख्य फरवार्ड करीम बेन्जेमा र भिनीसियस जुनिअरसँगै इडेन हाजार्ड रहेका छन् । हाजार्ड चेल्सी छाडेपछि पहिलो पटक स्टामफर्ड ब्रिजमा खेल्दैछन् ।

यता चेल्सीले भने पहिलो लेगमा सुरुवाती गोल गरेका विंगर क्रिस्टियन पुलिसिचलाई बेन्चमा राखेको छ । उनको स्थानमा जर्मन मिडफिल्डर काइ हाभर्ट्ज टोलीमा आएका छन् । काइसँगै मेसन माउन्ट र टिमो वेर्नरले चेल्सीको आक्रमण सम्हाल्नेछन् ।

प्रशिक्षक थोमस टुचेलले एन्टोनियो रुडीगर, अन्द्रेस क्रिस्टेनसन र थियागो सिल्भासँगै बेन चिल्वेल र सेजार एज्पिलिक्वेटालाई डिफेन्समा उतारेका छन् । मिडफिल्डको जिम्मेवारी एनगोलो कान्टे र जर्जिन्होले सम्हाल्नेछन् । गोलरक्षकमा मेन्डी नै निरन्तर रहेका छन् ।

चेल्सीले रियलको घरेलु मैदानमा १-१ को बराबरीमा रोक्दै केहि राहतको सास फेरेको थियो । रियललाई फाइनलमा प्रवेश गर्न कम्तिमा एक गोल गर्नपर्ने अवस्था छ । गोलरहित बराबरीमाको अवस्थामा चेल्सी अवे गोलको आधारमा अघि बढ्नेछ । यस खेलको विजेताले फाइनलमा म्यानचेस्टर सिटीसँग उपाधिका लागि प्रतिस्पर्धा गर्नेछ ।