काठमाडौं (हाम्रो खेलकुद) – खुकुरी नेपाल सुपर लिग (एनएसएल) को लिग चरणको अन्तिम खेलमा आज आइतबार पुछारमा रहेको एफसी चितवनले शीर्ष दुईमा स्थान पक्का गरेको काठमाडौं रेजर्सको सामना गर्दैछ ।

खेल त्रिपरेश्वरस्थित दशरथ रंगशालामा साँझ ५:३० बजेपछि हुनेछ । लिगमा एक खेलमा पनि जित निकाल्न नसकेको चितवन काठमाडौंलाई हराउँदै लिगबाट सुखद बिदाई लिन चाहन्छ । चितवन लिगमा जित निकाल्न नसकेको एक्लो टोली हो । चितवनले लिगमा पाँच खेल खेल्दा २ बराबरी र ३ हारको नतिजा निकालेको छ ।

चितवनले ललितपुरसँग १–१ गोलको तथा बुटवल लुम्विनीसँग २–२ गोलको बराबरी खेलेको थियो । त्यसपछिको सबै तीन खेलमा चितवन धनगढीसाग ३–०, विराटनगरसँग २–० र पोखरासँग २–१ ले पराजित भएको थियो । लिगको सुरुवातसँगै चोटसँग जुध्न पुगेको चितवनलाई त्यसको असर खेलमा प्रत्यक्ष देखिएको छ ।

डिफेन्डरद्वय विकास खवास र विकास तामाङलाई गुमाएको चितवनले आफ्नो कप्तान भरत खवासको चोटले पनि पिरोल्दा विदेशी खेलाडीले सोचेअनुरुपको खेल पस्कन सकेका छैनन् । कप्तान भरत पुर्ण रुपमा फिट छैनन् । अक्सनमा अनसोल्ड रहेका जर्जप्रिन्स कार्कीको आगमनसँगै टोली केहि सन्तुलित देखिएपनि हालसम्म जित निकाल्न सकेको छैन ।

चोटले पिरोलेको चितवनसँग विदेशी खेलाडीमा गोरान जर्काेभिच, अहमद मोहम्मद र इलसायद सावन छन् । शिशिर लेखी, कुलदिप कार्की, मनिष थापा, रुप बहादुर लामा, अमित तामाङ, सिमन्त थापा, विश्व अधिकारी, राजीव लोप्चन र टेक बहादुर बुढाथोकी टोलीमा रहेका छन् । प्रतिबन्धका कारण गोलरक्षक विशाल सुनारले काठमाडौंविरुद्ध खेल्ने छैनन् । उनले पोखरा थन्डर्सविरुद्धको खेलमा पेनाल्टी बक्स बाहिर आएर बल पञ्च गरेपछि रातो कार्ड खाँदै मैदानबाट बाहिरिएको थियो ।

विशालको स्थानमा विश्वास चौधरी वा रोमन रसाइलीले चितवनको पोस्ट सम्हाल्नेछन् । यता, शीर्ष दुईमा स्थान पक्का गरिसकेको काठमाडौं चितवनलाई हराउँदै शीर्षस्थानमा उक्लने दाउमा हुनेछ । समान १० अंक भएपनि हेड टु हेडमा काठमाडौं दोस्रो स्थानमा छ । टोलीसँग मार्की खेलाडी तथा कप्तान गोलरक्षक विकेश कुथु, तेज तामाङ, सन्जोक राई, विश्वास श्रेष्ठ, सुदिल राई, आशिष गुरुङ, छिरिङ गुरुङ, आशिष राई तथा विदेशी खेलाडीमा मेसौके ओलुमोउ, स्टेफेन समिर र फ्लोरेन्ट कोर्वा रहेका छन् ।

यस्तै सुदिप शिख्रकार, विश्वास उदास, राजन गुरुङ, विनय श्रेष्ठ, रुमेश बर्तौला, अन्जन राई, प्रेजेन तामाङ र अमृत श्रेष्ठ टोलीमा छन् । विराटनगरविरुद्ध ह्याट्रिक पुरा गरेका मेसौके ओलुमोउ टोलीका लागि मुख्य हतियार हुनेछन् । उनी लिगमा ह्याट्रिक पुरा गर्ने एक्ला खेलाडी हुन् ।

शीर्ष दुई टोली धनगढी र काठमाडौंले फाइनलमा प्रवेशका लागि २८ वैशाखमा खेल्नेछन् । यस खेलमा पराजित हुने टोलीले २९ वैशाखमा हुने ललितपुर र बुटवल लुम्विनीबीचको विजेतासँग पुनः फाइनल प्रवेशका लागि ३० वैशाखमा खेल्नेछ । फाइनल १ जेठमा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछ । उपविजेताले १५ लाख रुपैयाँ हात पार्नेछ । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।