काठमाडौं (हाम्रो खेलकुद) – काठमाडौं रेजर्सले खुकुरी नेपाल सुपर लिग (एनएसएल) मा एफसी चितवनविरुद्ध पहिलो हाफमा अग्रता लिएको छ । त्रिपुरेश्वरस्थित दशरथ रंगशालामा आइतबार भएको खेलमा काठमाडौंले चितवनविरुद्ध २–१ को अग्रता लिएको हो ।

काठमाडौंका मेसौके ओलुमोउ र सन्जोक राईले गोल गर्दा चितवनका राजीज लोप्चनले एक गोल फर्काएका छन् । खेलको १६औं मिनेटमा मेसौके ओलुमोउले गोल गर्दै काठमाडौं रेजर्सलाई १–० को अग्रता दिलाए । विश्वास उदासको लामो पासलाई नियन्त्रणमा लिदै मेसौकले दुई डिफेन्डरबीचबाट गोलरक्षकबाट बिट गर्दै गोल गर्न सफल भएका थिए । जारी लिगमा उनको यो पाँचौ गोल हो । उनले विराटनगर सिटी एफसीविरुद्ध ह्याट्रिक पुरा गरेका थिए ।

३३औं मिनेटमा सन्जोक राईले गोल गर्दै काठमाडौंको अग्रता दोब्बर पारे । विश्वास श्रेष्ठको क्रसलाई चितवनका डिफेन्डर रुडी जोनाथनले क्लियर गर्न नसकेको बललाई सन्जोकले सहजै फिनिस गरेका थिए । लगत्तै ३५औं मिनेटमा मेसौके ओलुमोउको पासमा सन्जोकले सुवर्ण अवसर खेर फाले ।

४०औं मिनेटमा राजीव लोप्चनले गोल गर्दै खेललाई २–१ को अवस्थामा ल्याए । सुनिल श्रेष्ठको प्रहारलाई गोलरक्षक रोमन रसाइलीले रोकेपनि रिवाउन्डमा राजीवले गोल गर्न सफलल भएका हुन् । ४४औं मिनेटमा विश्वास श्रेष्ठको फ्रिकिक क्रसबारा लागेर बाहिरिदा काठमाडौं अग्रता बढाउनबाट चुक्यो ।

इन्ज्युरी समयको थप गरिएको दोस्रो मिनेटमा मनिष थापाको क्रसमा सुदिप शिख्रकारले राम्रोसाग क्लियर गर्न नसकेको बललाई पेनाल्टी बक्समा तेज तामाङले ह्यान्ड गरेको भन्दै चितवनले अपिल गरेपनि त्यसलाई रेफ्री नविन्द्र महर्जनले कुनै वास्ता गरेनन् ।

चितवन लिगमा पहिलो जितको खोजीमा रहँदा काठमाडौं जित निकाल्दै लिगको शीर्ष स्थानमा रहने दाउमा हुनेछ । शीर्ष दुई टोली धनगढी र काठमाडौंले फाइनलमा प्रवेशका लागि २८ बैशाखमा खेल्नेछ । यस खेलमा पराजित हुने टोलीले २९ बैशाखमा हुने ललितपुर र बुटवल लुम्विनीबीचको विजेतासँग पुनः फाइनल प्रवेशका लागि ३० बैशाखमा खेल्नेछ । फाइनल १ जेठमा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।