काठमाडौं (हाम्रो खेलकुद) – राजधानीमा जारी खुकुरी नेपाल सुपर लिग (एनएसएल) मा ५० गोल पुरा भएको छ । एफसी चितवनका राजीव लोप्चनले काठमाडौं रेजर्सविरुद्ध गोल गरेपछि लिगमा ५० गोल पुरा भएको हो ।

लिगमा राजीवको यो पहिलो गोल हो । एनएसएलको लिग चरणको खेल सकिदा लिगमा हालसम्म ३२ खेलाडीले गोल गर्दा सर्वाधिक गोलकर्ताको सुचीमा काठमाडौं रेजर्सका मेसौके ओलुमोउ अग्रस्थानमा रहेका छन् । उनले लिग चरणका ६ खेलमा ५ गोल गरेका छन् ।

मेसौकेले लिग चरणको पाँचौ राउन्डको खेलमा विराटनगर सिटी एफसीविरुद्ध ह्याट्रिक पुरा गरेका थिए । ओलुमोउ नै लिगको पहिलो गोलकर्ता समेत हुन् । उनले काठमाडौं रेजर्सका लागि ललितपुरविरुद्ध उद्घाटन खेलमा गोल गरेका थिए । त्यसपछि उनले एफसी चितवनविरुद्ध गोल गरेका थिए ।

लिगको एकै खेलमा सर्वाधिक ९ गोल भएको छ । काठमाडौं रेजर्सले विराटनगरलाई ५-४ ले पराजित गरेको खेलमा मेसौकेले ह्याट्रिक पूरा गरेका थिए । त्यस्तै लिगमा दुई खेल गोलरहित बराबरीमा टुंगियो । पोखरा थन्डर्सले काठमाडौं रेजर्स र ललितपुर सिटीसँग गोलरहित बराबरी खेलेको थियो ।

सर्वाधिक गोल गर्ने खेलाडीमा मेसौके ५ गोलमा छन् । विराटनगरका पेड्रो मान्जी र धनगढीका आफिज ओलाडिपोको ४-४ गोल रहेको छ । अन्जन विष्ट र सन्तोष तामाङले ३ गोल गरेका छन् ।