काठमाडौं (हाम्रो खेलकुद) – एफसी चितवनले जितविहीन बन्दै खुकुरी नेपाल सुपर लिग (एनएसएल) सकाएको छ । आइतबार लिग चरणको अन्तिम खेलमा प्ले अफमा स्थान पक्का गरिसकेको काठमाडौं रेजर्ससँग २–१ ले पराजित हुदै चितवन लिगमा जितविहीन बनेको हो ।

लिगमा चितवनले ६ खेल खेल्दा दुई बराबरी र चार हारको नतिजा निकाल्यो । यसक्रममा चितवनले ५ गोल गर्दा ११ गोल खाएको छ । लिगमा चितवनले ललितपुरसँग १–१ गोलको तथा बुटवल लुम्विनीसँग २–२ गोलको बराबरी खेलेको थियो । त्यसपछिको सबै तीन खेलमा चितवन धनगढीसाग ३–०, विराटनगरसँग २–० र पोखरासँग २–१ ले पराजित भएको थियो । लिगमा पोखराले २ अंक मात्रै जोड्न सक्यो ।

त्रिपुरेश्वरस्थित दशरथ रंगशालामा आइतबार भएको खेलमा काठमाडौंले चितवनलाई हराएसँगै लिगको शीर्षस्थानमा उक्लिएको छ । काठमाडौंले लिगको ६ खेलबाट ४ जित र १ बराबरी र १ हारबाट १३ अंक जोड्यो ।

काठमाडौंका मेसौके ओलुमोउ र सन्जोक राईले गोल गर्दा चितवनका राजीज लोप्चनले एक गोल फर्काए । खेलको १६औं मिनेटमा मेसौके ओलुमोउले गोल गर्दै काठमाडौं रेजर्सलाई १–० को अग्रता दिलाए । विश्वास उदासको लामो पासलाई नियन्त्रणमा लिदै मेसौकले दुई डिफेन्डरबीचबाट गोलरक्षकबाट बिट गर्दै गोल गर्न सफल भएका थिए । जारी लिगमा उनको यो पाँचौ गोल हो । उनले विराटनगर सिटी एफसीविरुद्ध ह्याट्रिक पुरा गरेका थिए ।

३३औं मिनेटमा सन्जोक राईले गोल गर्दै काठमाडौंको अग्रता दोब्बर पारे । विश्वास श्रेष्ठको क्रसलाई चितवनका डिफेन्डर रुडी जोनाथनले क्लियर गर्न नसकेको बललाई सन्जोकले सहजै फिनिस गरेका थिए । लगत्तै ३५औं मिनेटमा मेसौके ओलुमोउको पासमा सन्जोकले सुवर्ण अवसर खेर फाले ।

४०औं मिनेटमा राजीव लोप्चनले गोल गर्दै खेललाई २–१ को अवस्थामा ल्याए । सुनिल श्रेष्ठको प्रहारलाई गोलरक्षक रोमन रसाइलीले रोकेपनि रिवाउन्डमा राजीवले गोल गर्न सफलल भएका हुन् । ४४औं मिनेटमा विश्वास श्रेष्ठको फ्रिकिक क्रसबारा लागेर बाहिरिदा काठमाडौं अग्रता बढाउनबाट चुक्यो ।

इन्ज्युरी समयको थप गरिएको दोस्रो मिनेटमा मनिष थापाको क्रसमा सुदिप शिख्रकारले राम्रोसाग क्लियर गर्न नसकेको बललाई पेनाल्टी बक्समा तेज तामाङले ह्यान्ड गरेको भन्दै चितवनले अपिल गरेपनि त्यसलाई रेफ्री नविन्द्र महर्जनले कुनै वास्ता गरेनन् । दोस्रो हाफमा दुवै टोलीबाट उल्लेख्य गोलको अवसर सिर्जन हुन सकेन ।

८१औं मिनेटमा प्रिजेन तामाङले वान भर्सेस वानको अवस्थामा गरेको प्रहार गोलरक्षक रोमन रसाइलीलाई लाग्दै बाहिरिदा काठमाडौंले अग्रता बढाउन सकेन । इन्ज्युरी समयको थप गरिएको तेस्रो मिनेटमा कर्नरबाट आएको बललाई गोरान जर्काेभिचको प्रहारलाई गोलरक्षक विनय श्रेष्ठले विफल पार्दा चितवन बराबरीबाट चुक्यो ।

काठमाडौं रेजर्सका विश्वास उदास इमर्जिङ प्लेय अफ दि म्याच घोषित भए । उनले १० हजार रुपैयाँ हात पारे । काठमाडौं रेजर्सकै तेज तामाङ प्लेयर अफ दि म्याच घोषित भए । उनले ट्रफीसँगै २५ हजार रुपैयाँ हात पारे ।

शीर्ष दुई टोली धनगढी र काठमाडौंले फाइनलमा प्रवेशका लागि २८ बैशाखमा खेल्नेछ । यस खेलमा पराजित हुने टोलीले २९ बैशाखमा हुने ललितपुर र बुटवल लुम्विनीबीचको विजेतासँग पुनः फाइनल प्रवेशका लागि ३० बैशाखमा खेल्नेछ । फाइनल १ जेठमा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।