एजेन्सी – क्याटलान क्लब बार्सिलोना तथा स्पेनका पुर्व मिडफिल्डर आन्द्रेस इनिष्टाले जापानी क्लब भिसेल कोवेसँग नयाँ सम्झौता गरेका छन् ।

इनिष्टाले आफ्नो ३७ वर्षको जन्मदिनको अवसर पारेर जे लिग क्लब कोवेसँग थप दुई वर्षको सम्झौता नविकरण गरेका हुन् । यससँगै इनिष्टा २०२३ सम्म जापानी क्लमा रहनेछन् । बार्सिलोनाकै एकेडेमी ला मासियामा हुर्किएका इनिष्टाले बार्सिलोनामा १६ सिजन र समग्रमा २० बर्ष बार्सिलोनामा बिताएपछि उनी सन् २०१८ मा जापानी लिग क्लबमा तीन वर्षको लागि अनुबन्ध भएका थिए । अनुबन्ध सकिनै लाग्दा उनले कोवेमा नयाँ सम्झौता नविकरण गरेका हुन् ।

७ डिसेम्वर २०२० मा एएफसी च्याम्पियन्स लिगको प्रि–क्वाटरफाइनलमा सांघाई सिपिगविरुद्ध २–० को जित निकालेको खेलमा उनले रिक्टस फेमोरि मसल्समा चोट बोकेपछि उनी टोली बाहिर रहेका थिए । उनले उक्त खेलमा एक गोल गरेका थिए । उनले यसै साता बार्सिलोनामा सफल शल्यक्रिया गरिसकेका छन् ।

मिडफिल्डका बादशाह मानिने कोवेका लागि यो सिजनसहित चार सिजनमा ७५ खेल खेल्दै १६ गोल तथा १८ असिस्ट दिएका छन् । उनको टिमले इम्पेरियर कप २०१९ र जापानीज सुपर कप २०२० को उपाधि जितेका छन् ।

बार्सिलोनामा हुँदा ९ पटक ला लिगा, ४ पटक च्याम्पियन्स लिग, ६ पटक कोपा डेल रे, तीन पटक क्लव विश्वकपको उपाधि जितेका इनियष्टाले स्पेनबाट एक विश्वकप र दुई युरोपक जितेका थिए । उनले स्पेनबाट १३१ क्याप जित्दै १३ अन्तर्राष्ट्रिय गोल गरेका छन् ।