काठमाडौं (हाम्रो खेलकुद)– पहिलो फ्रेन्चाईज फुटबल नेपाल सुपर लिग (एनएसएल) को अधिकांश व्यक्तिगत अवार्ड फाइनल खेल्ने दुई टोलीका खेलाडीले जिते ।

फाइनल नपुग्ने टोलीमध्येबाट एक खेलाडीले मात्र उत्कृष्ट अवार्ड जित्न सफल भए । ललितपुर सिटी एफसीका कप्तान अन्जन विष्ट लिगको उत्कृष्ट फरवार्ड चुनिए । राष्ट्रिय टोलीको बन्द प्रशिक्षणमा रेहका कारण फाइनल खेलमा उपस्थित हुन नपाएका अन्जन एनएसएलका उत्कृष्ट फरवार्ड चुनिएका थिए ।

एनएसएलको च्याम्पियन टोली काठमाडौं रेजर्सका बालगोपाल महर्जन उत्कृष्ट प्रशिक्षक, मेसुके उत्कृष्ट मिडफिल्ड तथा धनगढी एफसीका किरण चेम्जोङ उत्कृष्ट गोलकिपर र दीनेश राजवंशी उत्कृष्ट रक्षक घोषित भएका थिए । उत्कृष्ट सबैले समान १-१ लाख रुपैयाँ प्राप्त गरे । काठमाडौंका विश्वास श्रेष्ठ इमर्जिङ प्लेयर चुनिए र ५० हजार रुपैयाँ प्राप्त गरे । बुटवल लुम्बनी एफसीले फेयर प्ले अवार्ड जित्यो ।

फाइनलमा पुर्याउन नसकेकोमा अन्जनले ललिपुरका समर्थकसँग माफी मागेका थिए । सुरुवाती ४ खेलमा ३ अंक जोडेर निकै दबाबमा रहेको ललितपुर त्यसपछि लगातार २ खेल जित्दै प्ले अफका लागि चुनिएको थियो । अन्तिम २ खेलमा अन्जनले टोलीका लागि ३ गोल गरेका थिए । दोस्रो प्ले अफमा बुटवललाई हराउँदै ललितपुर इलिमेनटरमा पुगेको थियो । अघिल्ला ४ खेलमा भने अन्जनले सन्तोषजक प्रदर्शन गरे पनि गोलको खाता खोल्न सकेका थिएनन् ।

उनले एनएसएलले नेपाली फुटबल विकासमा अर्को एउटा सिढी थप्ने विश्वास लिएका छन् । आफ्नो टोलीको खेल सकिएपछि उनले भनेका थिए, ‘यो हामी खेलाडीका लागि प्रतिस्पर्धात्मक फुटबल खेल्ने राम्रो अवसर हो । आउने दिनमा एनएसएल अझै प्रतिस्पर्धात्मक हुने विश्वास छ ।’

विश्वास श्रेष्ठले काठमाडौंका लागि यस सिजन डिफेन्स र आक्रमण दुवै भूमिकामा जिम्मेवारी वहन गरे । यसअघि बालगोपाल महर्जनकै प्रशिक्षणमा खेलेकाले केहि सहज भएको उनले बताए । ‘ बालगोपाल सरकै प्रशिक्षणमा उमेर समूहमा पनि खेलेको थिएँ । त्यसैले टोलीलाई आवश्यकता परेपछि डिफेन्स खेलेको हुँ । उपाधि जित्ने टोलीलाई योगदान दिन पाउँदा निकै खुसी छु,’ उनले भने ।

धनगढीका कप्तान किरण चेम्जोङ लिगको सर्वोत्कृष्ट गोलरक्षक चुनिए । तर उनी टोलीले हारेकोमा बढी दुखित देखिए । ‘फाइनलमा हाम्रो आक्रमण चल्न सकेन । अगाडी राम्रो प्रदर्शन हुन नसक्दा उपाधि जित्न सकेनौं । दोस्रो हाफ राम्रो भएपनि गोल निस्केन । म सधैं जित्नुपर्छ भन्ने लक्ष्य लिएर अघि बढ्ने खेलाडी हुँ, त्यसैले पनि केहि समय बाँकी हुँदा आफैं आक्रमणमा पनि पुगें । तर हामी हर्न पुग्यौं,’ उनले थपे ।

विजयी टोलीका प्रशिक्षक बालगोपाल महर्जनले उपाधि काठमाडौंमा नै राख्न पाउँदा खुसी व्यक्त गरे । ‘हामीले पछिल्ला खेलमा हार बेहोर्दाका गल्ति सुधार गर्यौं । पहिलो संस्करणको लिगको उपाधि काठमाडौंमा नै राख्न पाउँदा खुसी छौँ । खेलाडीले रणनीति परिवर्तन गरेपनि एकै रुपमा प्रदर्शन गर्न सके । निकै खुसी छु,’ उनले भने ।

लिगका उत्कृष्ट डिफेन्डर दीनेश राजवंशीले फाइनलमा पराजित हुँदा दुख लागेको बताए । ‘ फाइनलमा आक्रमणकै कमजोरीका कारण हार्न पुग्यौं । आक्रमणले दबाब नै बनाउन नसक्दा हामीले धेरै थेग्न सकेनौं,’ उनले भने,’ रक्षात्मक रुपमा हाम्रो प्रदर्शन राम्रो रहयो । म आफैं सेन्टर डिफेन्समा यसअघि पनि खेलेकाले कुनै समस्या थिएन । आक्रमण राम्रो भएको भए जित्ने थियौं होला ।’

लिगका सर्वाधिक गोलकर्ता तथा उत्कृष्ट फरवार्ड मेसुके ओलोमोउले सुपर लिग जित्दा खुसी व्यक्त गरे । ‘सुपर लिगको स्तर ए डिभिजन भन्दा उच्च छ । हामीले निकै मिहिनेत गरेर सफलता हासिल गरेका हौं । पछिल्ला खेलमा पराजित हुँदा आज जसरि नि गोल गर्नुपर्छ भन्ने थियो, त्यसमा सफल भयौं,’ उनले भने ।