एजेन्सी – झन्डै दुई दशकदेखि क्याटलन क्लब बार्सिलोनाबाट खेल्दै आएका अर्जेन्टिनी फरवार्ड लियोनेल मेस्सी क्लबसँगको नयाँ सम्झौता नजिक छन् ।

क्लबका कप्तान समेत रहेको मेस्सीको हालको सम्झौता यो सिजनको अन्त्यसम्म रहेको छ । तर अझै पनि नयाँ सहमति हुन सकेको छैन । यस्तो अवस्थामा क्लबले उनलाई राख्न प्रयास गर्नेछ । तर पछिल्लो समय बार्सिलोनाले ३४ वर्षीय मेस्सीको सम्झौतासँगै युवा स्टार एर्लिङ ब्राउट हालान्डलाई प्राथमिकतामा राख्न थालेको छ ।

बेलायती पत्रिका दि सनका अनुसार क्लबले मेस्सीको सम्झौतासँगै जर्मन क्लब बोरुसिया डर्टमुृन्डका नर्वेजियन युवा स्टार हालान्डलाई प्राथमिकतामा राखिएको जनाएको छ । हालान्ड अनुबन्धमा बार्सिलोनालाई आर्थिक चुनौती हुने भनिदै आएपनि सनका अनुसार क्लबले मेस्सीलाई पनि क्लबमा राख्दै हालान्ड अनुबन्ध गर्ने योजना बनाएको छ ।

चरम आर्थिक संकट झेलिरहेको बार्सिलोनाले यस सिजन मेस्सीलाई क्लबमा राख्दै हालान्डलाई अनुबन्ध गर्न सके क्लबलाई फाइदा पुग्ने अनुमान गरिएको छ । तर बार्सिलोनाका निम्ति हालान्ड अनुबन्ध आफैमा चुनौतीपूर्ण छ । खेलाडीको पारिश्रमिक कटौती गर्नुपर्ने हुन्छ साथै बार्सिलोनाले आफ्नो खेलाडी बेच्दै क्लबमा आर्थिक मजबुत पार्नु जरुरी छ । हालान्ड अनुबन्ध गर्न क्लबले कम्तिमा ११० मिलियन युरो खर्चनुपर्नेछ ।